تۇركىستان وبلىسىنىڭ اكىمى نۇرالحان كوشەروۆ ايماق بيلىگى ونەركاسىپتىك جىلىجايلاردى دامىتۋعا كىرىسكەنىن ايتتى، دەپ حابارلايدى "ادىرنا" ۇلتتىق پورتالى.
بيىل كەلەس اۋدانىندا Ecoculture Eurasia كەشەنىنىڭ ءبىرىنشى كەزەڭى ىسكە قوسىلادى دەپ جوسپارلانىپ وتىر. بۇل تۋرالى ول ءباسپاسوز كونفەرەنتسياسىندا مالىمدەدى.
«كەلەس اۋدانىندا 500 گەكتار اۋماقتا ءىرى جىلىجاي كەشەنى — Ecoculture Eurasia سالىنىپ جاتىر. جىل بويىنا 240 مىڭ توننادان استام كوكونىس وسىرۋگە مۇمكىندىك بەرىلەدى. جوبادا 7 مىڭ جۇمىس ورنى قۇرىلماق. بيىل ءبىرىنشى كەزەڭ ىسكە قوسىلادى»، – دەدى اكىم.
جىلىجايدا نەگىزىنەن قىزاناق وسىرىلمەك. جوبانىڭ قۇنى 42 ملرد تەڭگە، ونىڭ 25 ملرد تەڭگەسىن قازاقستاننىڭ دامۋ بانكى 11% جىلدىق مولشەرلەمەمەن 2031 جىلعا دەيىن نەسيە رەتىندە بەرگەن. قارىز الۋشىنىڭ ءوز قاراجاتى – 8,4 ملرد تەڭگە، ال باسقا كرەديتورلاردان – 8,7 ملرد تەڭگە. كومپانيانىڭ سوڭعى بەنەفيتسيارلارىنىڭ ءۇش ادام ەكەنى حابارلاندى:
-
عازيزا شابدارباەۆا – بۇرىنعى ۇقك توراعاسى امانكەلدى شابدارباەۆتىڭ ۇلى ارلان شابدارباەۆتىڭ ايەلى;
-
سالتانات ءداۋىتوۆا;
-
رەسەيلىك اگروونەركاسىپ حولدينگى «ەكو-مادەنيەت» پرەزيدەنتى الەكساندر رۋداكوۆ.
اكىمنىڭ ايتۋىنشا، ەلىمىزدەگى جىلىجايلاردىڭ 71%-ى تۇركىستان وبلىسىنا تيەسىلى. بيىل جىلىجايلاردىڭ اۋدانى 75 گا-عا ۇلعايىپ، 1 715 گا-عا جەتكەن. بۇل وبلىستىڭ رەسپۋبليكالىق كولەمدەگى ۇلەسىن 76%-عا جەتكىزدى.
جىلىجايلاردىڭ العاشقى اينالىمىنان 102 مىڭ توننا كوكونىس جينالدى. كەلەر جىلى اۋداندى تاعى 62 گا-عا ۇلعايتۋ جوسپارلانىپ وتىر. وسىلايشا، وبلىستىڭ كوكونىس وندىرىسىندەگى ۇلەسى 80%-عا جەتەدى.
اكىمنىڭ پىكىرىنشە، اتالمىش كلاستەرلەردى دامىتۋ جەڭىل ونەركاسىپ كولەمىن 2026 جىلعا دەيىن 220 ملرد تەڭگەگە، ال اۋىل شارۋاشىلىعىن قوسىمشا 338 ملرد تەڭگەگە ۇلعايتۋعا وڭ اسەرىن تيگىزەدى.
