Түркістан облысының әкімі Нұралхан Көшеров аймақ билігі өнеркәсіптік жылыжайларды дамытуға кіріскенін айтты, деп хабарлайды "Адырна" ұлттық порталы.
Биыл Келес ауданында Ecoculture Eurasia кешенінің бірінші кезеңі іске қосылады деп жоспарланып отыр. Бұл туралы ол баспасөз конференциясында мәлімдеді.
«Келес ауданында 500 гектар аумақта ірі жылыжай кешені — Ecoculture Eurasia салынып жатыр. Жыл бойына 240 мың тоннадан астам көкөніс өсіруге мүмкіндік беріледі. Жобада 7 мың жұмыс орны құрылмақ. Биыл бірінші кезең іске қосылады», – деді әкім.
Жылыжайда негізінен қызанақ өсірілмек. Жобаның құны 42 млрд теңге, оның 25 млрд теңгесін Қазақстанның Даму Банкі 11% жылдық мөлшерлемемен 2031 жылға дейін несие ретінде берген. Қарыз алушының өз қаражаты – 8,4 млрд теңге, ал басқа кредиторлардан – 8,7 млрд теңге. Компанияның соңғы бенефициарларының үш адам екені хабарланды:
-
Ғазиза Шабдарбаева – бұрынғы ҰҚК төрағасы Аманкелді Шабдарбаевтың ұлы Арлан Шабдарбаевтың әйелі;
-
Салтанат Дәуітова;
-
Ресейлік агроөнеркәсіп холдингі «ЭКО-мәдениет» президенті Александр Рудаков.
Әкімнің айтуынша, еліміздегі жылыжайлардың 71%-ы Түркістан облысына тиесілі. Биыл жылыжайлардың ауданы 75 га-ға ұлғайып, 1 715 га-ға жеткен. Бұл облыстың республикалық көлемдегі үлесін 76%-ға жеткізді.
Жылыжайлардың алғашқы айналымынан 102 мың тонна көкөніс жиналды. Келер жылы ауданды тағы 62 га-ға ұлғайту жоспарланып отыр. Осылайша, облыстың көкөніс өндірісіндегі үлесі 80%-ға жетеді.
Әкімнің пікірінше, аталмыш кластерлерді дамыту жеңіл өнеркәсіп көлемін 2026 жылға дейін 220 млрд теңгеге, ал ауыл шаруашылығын қосымша 338 млрд теңгеге ұлғайтуға оң әсерін тигізеді.
