الماتى قالاسىندا جاقىن كۇندەرى ەكولوگيالىق جاعدايدىڭ جاقسارۋى كۇتىلەدى، دەپ حابارلايدى "ادىرنا" ۇلتتىق پورتالى Almaty.tv ارناسىنا سىلتەمە جاساپ.
مامانداردىڭ ايتۋىنشا، جاۋعان جاڭبىر مەن قار، سونداي-اق جەلدىڭ كۇشەيۋى اتموسفەراداعى زياندى زاتتاردىڭ تارالۋىنا ىقپال ەتىپ، سموگتىڭ سەيىلۋىنە مۇمكىندىك بەرەدى.
ەكولوگتاردىڭ مالىمەتىنشە، جەلسىز كۇندەر مەن جاۋىن-شاشىننىڭ از بولۋى بيىل الماتىداعى اۋا ساپاسىنىڭ ناشارلاۋىنا سەبەپ بولعان. ال جەلمەن بىرگە جاۋعان جاڭبىر مەن دىمقىل قار تابيعي سۇزگى قىزمەتىن اتقارىپ، اۋاداعى ۇساق شاڭ-توزاڭ مەن زياندى بولشەكتەردى جەرگە «شايىپ تۇسىرەدى». كەي جاعدايلاردا وسىنداي تابيعي قۇبىلىستاردان كەيىن لاستاۋشى زاتتاردىڭ مولشەرى بىرنەشە ساعات ىشىندە 80 پايىزعا دەيىن ازايۋى مۇمكىن. اسىرەسە PM2.5 كورسەتكىشىنىڭ تومەندەۋى ايقىن بايقالادى.
قازاقستاندىق ەكولوگيالىق اۋديتورلار پالاتاسى قاۋىمداستىعىنىڭ وقۋ ورتالىعىنىڭ ديرەكتورى رايدين قاسىموۆ جاۋىن-شاشىن مەن جەلدىڭ ازدىعى ەكولوگيالىق جاعدايدى ۋشىقتىرعانىن اتاپ ءوتتى.
«بۇل جاعداي اتموسفەرالىق اۋانىڭ ساپاسىن ەداۋىر تومەندەتتى»، – دەدى.
سينوپتيكتەردىڭ حابارلاۋىنشا، الماتىدا الداعى كۇندەرى قۇبىلمالى اۋا رايى ساقتالادى. قالادا جاڭبىر مەن دىمقىل قار ءجيى جاۋىپ، تۇندە اۋا تەمپەراتۋراسى ازداپ تومەندەسە، كۇندىز جىلى بولادى دەپ كۇتىلۋدە. ءوڭىر ارقىلى وتەتىن تسيكلوندار مەن جەلدىڭ كۇشەيۋى اۋانىڭ تابيعي جولمەن تازارۋىنا قولايلى جاعداي جاسايدى.
