اقتوبەدە بەي-بەرەكەتسىز توگىلگەن قوقىستى پوليگونعا جەتكىزۋگە 95 ملن تەڭگە ءبولىندى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
قالا بيلىگىنىڭ ايتۋىنشا، شاھار توڭىرەگىن زەردەلەپ، ءار جەردە ۇيىلگەن تۇرمىستىق قالدىقتى انىقتاۋ ءۇشىن عارىشتان باقىلاۋ جاسالادى. وسىدان ەكى جىل بۇرىن 417 ورىن انىقتالسا، بىلتىر 230 ءۇيىندى بولعان. قۇرىلىس قالدىقتارى مەن ەسكى جيھاز سياقتى كولەمى ۇلكەن قوقىستى تۇرعىنداردىڭ وزدەرى پوليگونعا جەتكىزۋگە مىندەتتى. بىراق كوپ جاعدايدا بۇل تالاپ ەسكەرىلمەي كەلەدى.
«كوسمومونيتورينگ ارقىلى قۇزىرلى مينيسترلىك قوقىستىڭ ناقتى كولەمىن انىقتاعان سوڭ بيۋدجەتتەن ءتيىستى قاراجات بولۋگە ءساتى ءتۇستى. بيىل 95 ميلليون تەڭگە قاراستىرىلعان. بۇل قاراجاتتى قالانىڭ دامۋىنا جۇمساۋعا بولار. سوندىقتان بۇل قولدان جاسالعان ماسەلە. پوليتسەيلەر زاڭ بۇزعان ادامداردى انىقتاپ، جاۋاپقا تارتادى. ءبىزدىڭ قولىمىزعا دا تۇسەدى. بىراق اينالادا ۇيىلگەن قوقىستى ەكى جىل بويى شىعارىپ كەلە جاتقانىمىزبەن ماسەلە شەشىلمەي كەلەدى»،– دەدى قالا اكىمى اسحات شاحاروۆ.
