اقتوبە قالاسىنىڭ مەملەكەتتىك ساتىپ الۋلار ءبولىمى جاياۋ جۇرگىنشىلەر وتكەلىن جارىقتاندىرۋ جۇمىسىنا 17 ملن 244 مىڭ 591 تەڭگە قارجى ءبولدى، دەپ حابارلايدى ادىرنا ۇلتتىق پورتالى goszakup.gov.kz سايتىنا سىلتەمە جاساپ. قالاداعى جاياۋ جۇرگىنشىلەر وتكەلىن جاساۋعا تاپسىرىستى اقتوبە قالاسىنىڭ تۇرعىن-ءۇي كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى" ءبولىمى بەرگەن.
تەندەردىڭ وتەتىنى تۋرالى حابارلاما 27 قازان كۇنى جاريالاندى. جەڭىمپاز 3 قاراشادا انىقتالادى. تەندەردى ۇتىپ العان كومپانيا 17 ملن 244 مىڭ 591 تەڭگەگە بار بولعانى 11 جاياۋ جۇرگىنشىلەر وتكەلىنە جارىقتاندىرۋ جۇمىستارىن جۇرگىزەدى.
تەحنيكالىق سيپاتتامادا كەرەكتى قۇرال-جابدىق ساتىپ الۋ تۋرالى ەشتەڭە كورسەتىلمەگەن. سونداي-اق، تەحنيكالىق سيپاتتاماداعى "قۇرىلىسقا بايلانىستى ەمەس، ساتىپ الىناتىن جۇمىستاردىڭ تەحنيكالىق ەرەكشەلىگى" دەگەن سويلەمنەن جەڭىمپاز كومپانيا ساتىپ الىنىپ قويعان دايىن ماتەريالداردى ورناتىپ شىعۋ جۇمىسىنا عانا مىندەتتەلىپ وتىرعانىن بايقاۋعا بولادى. ياعني، 17 ملن 244 مىڭ 591 تەڭگەگە بار بولعانى 11 جاياۋ جۇرگىنشىلەر وتكەلىنە ەلەكتر باعانالارىن ورناتىپ، جارىق جالعاپ بەرەدى دەگەن ءسوز. كورسەتىلگەن سومانى 11-گە بولسەك، ءبىر عانا جاياۋ جۇرگىنشىلەر جولىنا ەلەكتر باعاندارىن ورناتۋ جۇمىسىنا 1 ملن 567 مىڭ 690 تەڭگە قارجى جۇمسالادى ەكەن.
ارينە، جاياۋ جۇرگىنشىلەر جولىن جاساۋ، جارىقتاندىرۋ قالا تۇرعىندارىنىڭ قاۋىپسىزدىگى ءۇشىن وتە قاجەت. بىراق، اقتوبە قالاسىنداعى جاياۋ جۇرگىنشىلەردىڭ 11 وتكەلىنىڭ ۇستىنە جارىقتاندىرۋعا ارنالعان باعانداردى ورناتۋ ءۇشىن بيۋدجەتتەن 17 ملن 244 مىڭ 591 تەڭگە اقشا ءبولۋ كوپ ەمەس پە؟ تەحنيكالىق سيپاتتامادا جۇمىسشىلاردىڭ الاتىن جالاقىسى عانا كورسەتىلگەن. سول جالاقى 251 مىڭ 197 تەڭگە دەپ بەلگىلەنىپتى. ياعني، 17 ملن 244 مىڭ 591 تەڭگەنى يگەرىپ، 11 وتكەلدى جارىقتاندىرۋ ءۇشىن كەمى الپىسقا جۋىق مامان جۇمىسقا تارتىلۋى كەرەك دەگەن ءسوز. سوندا اقتوبەلىكتەر 11 دانا جاياۋ جۇرگىنشى جولىن جارىقتاندىرۋ ءۇشىن الپىس مامان تارتاتىن بولعانى ما؟
بۇل سۇراقتاردى ءتيىستى مەكەمەلەرگە جولدادىق. جاۋاپ بەرىلىپ جاتسا، ونى دا جاريالايتىن بولامىز.
قانات بىرلىكۇلى
ادىرنا ۇلتتىق پورتالى
