Femınızm degen ne?
Áıelderdiń saıası, ekonomıkalyq, áleýmettik quqyqtaryn keńeıtýge baǵyttalǵan ıdeologııalar. Femınızmniń basty ıdeıasy – qoǵamnyń barlyq salasynda áıelderge erkektermen teń múmkinshilikterdi ornatý.
Bizdiń elimizde de sońǵy jyldary femınısterdiń sany artyp, ashyq mıtıngilerge de shyǵyp jatyr. Ǵasyrlar boıy ózin erinen bir saty tómen sanaǵan qazaq halqy úshin femınızm kerek pe? Femınızmdi kim qalaı túsinedi?
Osyǵan deıin Baıan Maqsatqyzy áıelder quqyǵyn qorǵaıtyn ortalyq ashqysy keletindigin aıtqan bolatyn. Sebebi ol kisi de turmystyq zorlyq-zombylyqtyń qurbany bolǵandyqtan osy máselege jiti den salyp aralasqysy keletindigin aıtqan. Odan basqa turmystyq zorlyq-zombylyqqa tózip otyrǵandary men kóz jumǵandary qansha ma?
Bul týraly kim ne deıdi?
Alpysbaeva Oryntaı. Kópbalaly ana.
Kimdi kúıeýi urmady deısińder. Bárimizdi urmady emes urdy ǵoı. Shaıtannyń sýyna toıyp alyp kelgende artyq sóılep qalsam qol kóteretin. Áıtpese, atalaryń olaı kókala qoıdaı sabamapty. Ol kisi olaı kóp ishpeıdi. Saý kezinde joldasymnan asqan jaqsy adam joq. Osyndaı jaqsy adamdy qıyp bir-eki ret qol kótergenge bola ketip qalmadym. Ol kezde zaman qazirgideı emes edi. Biraq qazir jaǵdaı tym qorqynyshty. Áıelin qoımaı bala-shaǵasymen birge órtep jiberip jatqandar da bar eken. Qudaı saqtasyn. Mundaı esýastarmen kádimgideı kúresý kerek.
Sáýle Jaqsylyqqyzy. Psıholog
Maǵan kómek surap kúıeýinen turmystyq zorlyq-zombylyq kórgen áıelder men azǵyndardyń qurbanyna aınalǵan qyzdar qaýymy kóp keledi. Osynyń bárin kóre tura femınızmdi qalaı qoldamaısyń. Amal joq. Úıtip qorlyq kórip otyratyn shama joq. Kómek surap kelgenderdiń kóbi psıhologııalyq turǵydan óte nashar hálde bolady. Keıde shydaı almaı ózderin tastap qol jumsaıtyndary da bar. Qolymnan kelgenshe kómegimdi aıamaımyn. Kúıeýinen zábir kórgender jańa ómir bastaýǵa ıkemdeý ońaıyraq. Al azǵyndardyń azyǵyna aınalyp, jastaıynan taǵdyr tálkegine ushyraǵan qyzdar qaýymyna kómek kórsetip, bunyń ótkinshi ekenin túsindirý qıynyraq. Sol sebepti erkektermen birdeı bolyp ıyq tirespesek te, aman-esen júre alatyndaı bolsaq eken.
Talǵat Amanjolov. Muǵalim
Femınızm ornasyn. Men qarsy emespin. Áıelder men erkekterdiń quqyqtary teń bolsyn. Erkekter de áıelder sııaqty erterek zeınetaqy alsyn. Jaqsy emes pe?! Men qoldaımyn. Biraq áıelder úshin qorqamyn. Erkektermen quqyǵymyz teń bolsyn dep júrgende bar múmkindikterińizden aıyrylyp qalasyzdar ma dep. Qyz balany o bastan syılap úırengen edik. Femınız ornasa osyndaı syılastyqtyń ıisin de sezbeı qalýlaryńyz múmkin ǵoı. Men tań qalamyn,sonda áıelder qaýymy erkekterdiń jumysyn isteýge daıyn ba eken?
Aqbota Nurǵalı. Stýdent.
Elimizde femınızmniń ornamaıtynyn bilsem de, ornaǵanyn qatty qalaımyn. Iá, men femınıstkamyn. Áıelderdiń quqyǵy erkektermen teń bolǵanyn qalaımyn. Jyldar saıyn sany artyp jatqan qyz zorlaý men turmystyq zorlyq-zombylyqtyń sany azaısa eken. Óz elimde emin erkin eshkimnen qoryqpaı ómir súrgim keledi. Bir kúni áıteýir bári ońalar.
Aınur Syrymqyzy. Medbıke
Femınızm bizdiń qoǵamǵa jat. Biraq sonyń ishinde qoldaıtyn tustarym bar. Qansha arystandy aıǵa aparsań da erkektermen birdeı bola almaısyń. Ol anyq. Al erkekterden zábir kórip otryǵan áıelderdiń quqyqtaryn qorǵap,aldyn alý maqsatynda birtalaı jumystardy atqarý kerek. Jazyqsyzdan jazyqsyz jastaıynan taǵdyryna balta shabylyp jatqan qyzdar qansha ma? Ondaıǵa jol bermeý kerek. Femınızmniń osy tusy bizge kerek.
Laýra TURSYNJAN, “Adyrna” ulttyq portaly
