Perýdegi “Real Tıtan” fýtbol klýbynyń 21 jastaǵy oıynshysy Helar Gonsales Altamırano alańda alǵan jaraqatynan keıin qaıtys boldy, dep habarlaıdy “Adyrna” ulttyq portaly tengrisport-qa siltep.
Oqıǵa Kýbok Perý matchynda “Defensor Nýeva” komandasyna qarsy oıynda oryn aldy. Oıynnyń 70-shi mınýtynda Gonsales áýe dobyn alý kezinde qarsylas komandanyń qaqpashysymen soqtyǵysyp, aýyr bas jaraqatyn aldy. Ol es-tússiz kúıde Moıobamba qalasyndaǵy aýrýhanaǵa jetkizilgen. Degenmen, aq halattylar ony aman alyp qala almaǵan. Eki kúnnen keıin sportshy ómirden ótti. Óliminiń sebebi bas mı arterııasynyń jarylýy bolǵany anyqtaldy.
“Real Tıtan” klýby áleýmettik jelilerde Gonsaleske qurmet kórsetti.
“Biz seni fýtbolǵa jáne otbasyńa degen súıispenshiligiń úshin árdaıym eske alamyz. Sen bizdiń kóshbasshymyz boldyń jáne bizge úlken qaıǵy qaldyrdyń”, - dep jazba jarııalady.
Helardyń ákesi, Hose Mıgel Gonsales Flores, ulynyń bala kezinen bastap fýtbolshy bolýdy armandaǵanyn aıtyp, qoldaý kórsetken barlyq qaýymdastyqtarǵa alǵysyn bildirdi.
