«QazAvtoJol» ulttyq kompanııasy taǵy Eýropalyq qaıta qurý jáne damý bankinen (EQDB) nesıe almaq. Bul týraly halyqaralyq qarjy ınstıtýynyń saıtynda jazylǵan, dep habarlaıdy ”Adyrna” ulttyq portaly kursiv.kz saıtyna siltep.
Saıtta jazylǵan málimetke sáıkes, bank ulttyq kompanııaǵa 232,6 mlrd teńge kóleminde qarjy bermek. Bul qarajat jobalyq jáne qurylys jumystaryna jumsalady, sondaı-aq Aqtóbe-Ulǵaısyn jolynyń 234 shaqyrymyn qaıta jóndeýden ótkizedi.
Ázirge nesıe berý týraly joba qaralyp jatyr, 7 mamyrda bekitilýi kerek. EQDB-men qatar Azııalyq ınfraqurylymdyq ınvestıııa banki de qarjylandyrý bóledi.
Jospar boıynsha, Aqtóbe-Ulǵaısyn avtojoly eki jolaqtan tórt jolaqqa deıin keńeıýi kerek. Jalpy jobanyń qunyn 1 mlrd eýro dep baǵalap otyr. Negizgi tórt aýmaqqa bólingen. Aqtóbe-Ajar (28 shaqyrym), Aqjar-Hromtaý (28 shaqyrym, qurylys kezeńinde), Hromtaý-Belqopa (108 shaqyrym) jáne Belqopa-Ulǵaısyn (98 shaqyrym).
Inbusiness esepteýinshe, bul joba «QazAvtoJol» men eýropalyq bank arasyndaǵy altynshy nesıelik kelisim. Buǵan deıin 2024 jyly «QazAvtoJol» Dúnıejúzilik bank pen Azııalyq ınfraqurylymdyq ınvestıııalar bankinen 1,3 mlrd dollar ınvestıııa tartqan. Ol qarajat Qaraǵandy-Jezqazǵan avtojolynyń jóndeý jumystary úshin alynǵan. Al ótken jyly kúzde «QazAvtoJol» Azııalyq damý bankinen Qyzylorda-Jezqazǵan avtomagıstralin qalpyna keltirý úshin 291,5 mln dollar alady dep habarlanǵan edi.
Kompanııanyń qarjy esebine súıenetin bolsaq, 2024 jyldyń birinshi jartyjyldyǵynda «QazAvtoJoldyń» EQDB aldynda 180 mlrd teńge, Azııalyq damý banki aldynda 64 mlrd teńge, Qytaı Eksımbanki 723 mlrd teńge jáne Eýrazııalyq damý banki aldynda 47 mlrd teńge uzaq merzimdi kredıti bolǵan. Bul qaryzdyń basym bóligin 2034-2039 jyldar aralyǵynda tóleýi qajet.
«QazAvtoJoldyń» aqyly joldardan tabys tabatynyn da eskerý kerek. 2024 jyly odan túsken kiris 399 mln teńgeni qurap, taza paıda 32%-ǵa artqan. Biraq shyǵyn da az emes. Byltyr jol ınfraqurylymyn jańalaýǵa, jóndeý jumystaryna jáne jol tehnıkasyn satyp alýǵa 47,4 mlrd teńge bólingen.
