Aqtaý mańynda bolǵan ushaq apatynan aman qalǵan jolaýshy oqıǵanyń qalaı bolǵanyn baıandady, dep habarlaıdy “Adyrna” ulttyq portaly Oxu.az-ǵa siltep.
Oxu.Az portaly apattan aman qalǵan Nurolla Sıradjovtyń jaǵdaıǵa áli de sene almaıtynyn habarlaǵan.
Apat kezinde ol áıelin sabyrǵa shaqyrǵanyn, biraq óz boıyn úreı bılegenin jasyrmady.
«Men áıelimmen birge Groznyıda turatyn ulyma bara jatqan edim. Ushaq alǵash ret soqqyǵa ushyraǵanda, aıaq astymnan ottyń jalynyn sezdim de, jaraqat aldym dep oıladym. Áıelimdi sabyrǵa shaqyrýǵa tyrystym. Biraq ózimde úreı basym boldy. Beldikti sheship, aıaq astyna qaraǵanymda ushaqtyń edeni bútin edi. Men qaıtadan ornyma otyrdym. Sol kezde ushaqtyń artqy bóligine aıtarlyqtaı qatty soqqy tıdi. Bortserikter jolaýshylardy sabyrǵa shaqyryp, Groznyıǵa qonatynymyzdy aıtty», – deıdi Sıradjov.
Ol ushaq tómendep kele jatqanda aman-esen jerge qonatynyna senimdi bolǵan.
«Men biz qonýǵa jaqyndaǵanymyzdy, áýejaı ǵımaratyn, jolaqtardy, ushaqtardy kórdim. On qabatty ǵımarattan tómenge qaraǵandaı elestetińiz. Biz jerge óte jaqyn boldyq. Qonatynymyzǵa senimdi edik», – deıdi ol.
Alaıda sol sátte ushaq qaıtadan jyldamdyq alyp, kókke kóterilgen.
Eske sala keteıik, Ázerbaıjannyń Zagatal aýdanynyń turǵyny Nýrýlla Sıradjov esimdi er adam apattan keıin áıelin taba almaı, alańdaǵanyn jetkizgen edi. Keıinnen ol ushaq apatynda tiri qalǵan áıelimen qaýyshqan.
