Úleskerlerdi zar qaqsatyp, páterge salǵan aqshasyn ońdy soldy shashqan qurylys kompanııalarynyń kryshasy kim? Ne alǵan úıi joq, ne salǵan aqshasy joq zarlap qalǵan halyqtyń obaly kimge? Qalaı ǵana jurttyń baspanaǵa dep salǵan aqshasyn jeke bas paıdasyna jaratady? Mıllıardtardy qylǵytqan, bıyl 66 jasqa kelgen Igor Jakov ne sebepti 6 jylǵa ǵana sottaldy?
"Aq qashyp, qyzyl qýyp" degendeı alaǵaı da bulaǵaı 1993 jyly Igor Aleksandruly «FONT» JShS quryp bastady. Keıinnen bul JShS-nyń quryltaıshylary «Building Group» JShS jáne Igor Jakov boldy. Naqtyraq aıtsaq 1997 jyldan beri osy kompanııany basqaryp keledi.
09.06.2005 «Building Service» JShS bolyp qurylyp, tirkeledi. Quryltaıshysy Jakov pen «FONT» JShS. Qalaı qalaı qubylady,á? Úsh kompanııa da bir-birimen tyǵyz baılanysty, úsheýi de Jakovqa qaraıdy.
Eń qyzyǵy, «Building Service» JShS menedjerleri bolyp:
2005-2008 jyldary - Nurǵazıev Murat Arshanuly, 2008-2011 jyldary - Daýrenbekov Valerıı Ahatovıch, 2011-2013 jyldary - Jakov Igor Aleksandrovıch, 2013 jyldan qazirgi ýaqytqa deıin qaıtadan - Nurǵazıev Murat Arshanuly.
Osy kompanııany quryp alǵan Jakov ne isteıdi? Durys aıtasyz, halyqty laqtyrýdy bastaıdy. Adamdar tobymen aldyn-ala sóz baılasý arqyly qylmystyq jospar quryp, ózine senip tapsyrylǵan aqshany ıemdenedi. Shot-faktýralardy, aýdarymdardy qabyldaý aktilerin berý arqyly seriktestiktiń býhgalterlerine nusqaýlar berip, kassalyq esep aıyrysý operaııalaryna túzetýler engizip, esepke alý qujattarynyń telnusqasyn berip, «Taý-Kóktem» turǵyn úı keshenin salýǵa arnalǵan qarajatty qolma-qol aqshaǵa aınaldyrady da ózine alyp alady.
«Taý-Kóktem» turǵyn úı kesheninen úı alamyz dep, dámeleri dambaldaı bolǵan úleskerler «Building Service» JShS-niń kassasyna aqsha salǵan. Ol aqshany Jakovtyń qaltasyna óz qoldarymen salǵandaryn sezbeıdi de.
Al, Jakov qaıtedi? Ol Aston Martin, Maserati, Porsche Cayenne, Mercedes Benz, Lexus sekildi qymbat jańa kólikter, Ulysse Nardindegi Shyńǵyshan sekildi qymbat saǵattar men Vertu sııaqty qymbat telefondar alady.
2004 jylǵy 8 maýsymda «Building Group» JShS men «Grand Hotel Tien-Shan» JShS arasynda «Grand Hotel Tien-Shan» qonaq úı keshenin qaıta qurý jumystaryn júrgizýge kelisim-shart túziledi.
2006 jyly Jakov Sársenovtermen joǵarydaǵy qonaqúıdi qalpyna keltirý úshin jeke qarym-qatynasy negizinde olarǵa jalpy somasy 230 mıllıon teńgeden asatyn (sol kezde shamamen 2 mıllıon dollar) 3 páter tirkeıdi.
«BTA-Investstroıgrýpp» JShS-nyń sol kezdegi basshysy Tımýr Qonaqbaev «Building group» JShS-men «Taý-Kóktem» turǵyn úı keshenine beton quıý, takelajdyq jumystar, tirekterdi ornatý jáne qasbettik qabyrǵalardy armatýramen qaptaý kirpishterin qalaý jóninde kelisimge qol qoıady.
Dál osy ýaqytta dál osy «BTA-ınveststroıgrýpp» JShS tapsyrys berýshi retinde «Building Group» JShS-men Alma-Arasan shatqalynda Kók-Shoqty aýylynda qonaq úı salýǵa kelisim-shart jasasqan.
«BTA-Investroıgrýpp» JShS 602 mıllıon teńgege nesıe alyp, ol aqsha Qonaqbaev pen Jakovtyń esep-shotyna aýdarylady.
Jakov Qonaqbaevqa atqarǵan jumystary úshin 2005 jyly 15 mıllıon teńge turatyn (bastapqy quny 500 000 dollardan astam) Porsche Cayenne Turbo, GT750 AERO III Gembala kóligin syılaıdy.
«BTA-ınveststroıgrýpp» JShS-niń «Nurbank» AQ aldynda 4 982 752 230 teńge kredıtorlyq bereshegi bar, ol 4-shi kezekke 916 613 149 teńge jáne kredıtorlar talaptary tiziliminiń 5-shi kezektegi 413 069 teńge somasyna engizilgen.
Osy is materıaldaryna sáıkes, sol kezde Egovtyń anyqtamasyna sáıkes, Igor Aleksandrovıch Jakov «BTA-ınveststroıgrýpp» JShS basshysy, quryltaıshysy Tımýr Asylbekuly Qonaqbaev ekeni anyqtaldy.
Osylaısha, zańdy kúshine engen sot sheshimderimen «BTA-Investstroıgrýpp» JShS-niń «Nurbank» AQ aldynda 21 mlrd teńge qaryzy bar ekeni anyqtalyp, 4 983 352 267 teńge óndirildi.
Sóıtip jalǵandy jalpaǵynan basyp, mıllıondardy tıyn, mıllıardtardy teńge kórmegen Jakov Igor Aleksandruly ustalady.
2020 jyldyń 08 maýsymynda Almaty qalasy Medeý aýdandyq №2 soty «Building Service» JShS burynǵy qurylys salýshysynyń quryltaıshysy Jakov Igorǵa qatysty úkim shyǵaryp, ol úleskerlerdiń aqshasyn ıemdený jáne jymqyrý faktileri boıynsha kináli dep tanylyp, 2020 jyldyń 1 qazanynda 6 jylǵa sottaldy. Araǵa 2-3 jyl salyp qaıtadan erkindikke shyǵyp aldy. Bravo!
QR IIM! QR Bas prokýratýrasy!
Mynaý ne masqara? Halyqtyń bala-shaǵanyń aýzynan jyryp jınaǵan mıllıardtaryn jegen Jakov nebári 6 jylǵa sottalady da, 2-3 jylda shyǵyp alady! Memlekettiń ózi alaıaqtyqty zańdastyryp otyrǵan joq pa? Nege Jakovtyń jegenin qustyrmaıdy? Qarapaıym jurttyń aıyppulyn sońǵy tıynyna deıin tóletesińder ǵoı. Bunyń da dambalyna deıin sypyryp alyńdar!
Ánsheıinde taýyq urlaǵan kedeıdi 6 jylǵa sottap, ony merzimi bitpeı túrmeden shyǵarmaısyńdar! Mıllıardtardy qylǵytqan Jakov nege quspaǵan? Nege 6 jylǵa ǵana sottalyp, merziminiń jartysyna jetpeı shyǵyp alǵan? Álde, oǵan tıisýge Jakovtyń kókelerinen qorqasyńdar ma?
Ońǵar Qabden
P.S. Avtordyń pikiri redakııanyń kózqarasyn bildirmeıdi
