Jańa jyl qarsańynda Almatyda elimizdiń ár óńirinen jınalǵan talantty jastardy biriktirgen AUYL SPORT-2024 respýblıkalyq týrnıri óz máresine jetti. «Halyk» qaıyrymdylyq qory uıymdastyrǵan bul aýqymdy joba aýyldan shyqqan balalarǵa úlken múmkindikter syılap, olardyń daryndaryn kórsetýine jol ashty.
AUYL SPORT jobasy úsh aı buryn bastaý aldy. Jobanyń alǵashqy kezeńinde elimizdiń 200 aýylynan 12 myńnan astam bala men jasóspirim qatysqan oblystyq irikteý týrnırleri ótti. Fınalǵa ár oblystyń eń úzdik sportshylary jınaldy. Týrnırdiń negizgi maqsaty – aýyl balalaryna senim uıalatyp, úlken jetistikterge bastaý bolatyn múmkindikter berý.
«AUYL SPORT – bul jaı jarys emes, aýyl balalarynyń jańa kókjıekterin ashatyn shabyt alańy. Biz olardyń armanyn qoldaımyz jáne bolashaǵyna senemiz», – deıdi «Halyk» qorynyń Almaty fılıalynyń dırektory Ǵalymbek Jaqsylyqov.
Týrnırdiń fınalynda sportshylar boks, kúres, karate, basketbol, voleıbol jáne shahmat boıynsha baq synady. Bul jarysqa qatysýshylardyń kóbisi úshin úlken arenaǵa shyǵý – alǵashqy tájirıbe.
«Aýyl balalaryna iri týrnırlerge qatysý qıynǵa soǵady. Sondyqtan «Halyk» qorynyń qoldaýy olardyń sporttaǵy alǵashqy qadamyn jasaýyna múmkindik berdi. Bizdiń Olımpıada chempıondarynyń kópshiligi aýyldan shyqqanyn umytpaýymyz kerek», – deıdi erkin kúresten Bas tóreshi Berik Shalabaev.
Fınaldyq kezeńde Túrkistan oblysynan kelgen jas palýan Samır Rahmanalıev jeńimpaz atanyp, qýanyshymen bólisti.
«Men óz atymdy, aýylymnyń atyn asqaqtata alǵanyma sheksiz qýanyshtymyn! Bul men úshin eń úlken sporttyq is-shara boldy. Emoııalarymdy sózben aıtyp jetkizý múmkin emes!» - dedi ol.
13 jastaǵy Atyraý oblysy, Tasqala aýdanynyń jas sportshysy Serik Ámir erkin kúresten 35 kg salmaqta júldeli birinshi oryndy jeńip alyp, óziniń jetistigimen bólisti.
«Men 6 jyldan beri erkin kúrespen aınalysyp kelemin. Buǵan deıin Ózbekstan men Belarýs elderinde ótken jarystarǵa qatysyp, júldeli oryndarǵa ıe bolǵanmyn. Bul týrnır de men úshin jemisti boldy», - dep qýandy Qazaqstannyń erkin kúresten chempıony.
AUYL SPORT jobasy «Halyk» qorynyń aýyldyq jerlerdegi buqaralyq sportty damytýǵa baǵyttalǵan negizgi bastamalarynyń biri. Tek osy jobaǵa 500 mıllıon teńge bólinip, balalardyń sportqa degen qyzyǵýshylyǵyn arttyrýǵa jaǵdaı jasaldy.
«Bizdiń maqsatymyz – qaı jerde turatynyna qaramastan barlyq balalarǵa teń múmkindikter jasaý. Mundaı bastamalar jas urpaqtyń ózine degen senimin nyǵaıtyp, ómirdegi úlken jetistikterge jol ashady», – deıdi Ǵalymbek Jaqsylyqov.
AUYL SPORT jobasy aýyl balalaryna kásibı sport álemimen tanysýǵa múmkindik berip, olardyń armandaryna qanat bitirdi. Týrnır tek jarys emes, balalar men olardyń otbasylary úshin ómirdi ózgertetin jańa qadam boldy.
Uıymdastyrýshylardyń sózinshe, týrnır bolashaq chempıondardy tárbıeleýdiń mańyzdy alańyna aınaldy. AUYL SPORT – aýyldan úlken armanǵa jol ashatyn platforma.
Jas sportshylardyń tabysy olardyń tabandylyǵy men kúsh-jigeriniń jemisi ekenin kórsetti. AUYL SPORT – Qazaqstannyń jarqyn bolashaǵyn qalyptastyratyn urpaqqa senim men shabyt syılaǵan joba boldy.
