Brıtanııanyń London qalasynda sot aldynda jaýap berip jatqan Bolgarııa azamattary Qazaqstanǵa qarsy shabýyl daıyndaǵany anyqtaldy, dep habarlaıdy "Adyrna" ulttyq portaly Stan.kz-ke siltep.
Olar Reseı múddesi úshin tyńshylyq jasady dep aıyptalǵan. Kúdiktilerdiń biri - tyńshylyq jeliniń jetekshisi Orlın Rýsev. Ol Qazaqstan prezıdenti Qasym-Jomart Toqaevtyń ulyna qatysty materıaldar ázirlemek bolǵany aıtyldy.
Telegraph gazetiniń deregine sáıkes, Orlın Toqaevtyń ulyna qarsy materıal daıyndaý máselesin Interpol izdeý salǵan Ian Marsalekpen talqylaǵan. Al Ian Marsalek shabýyl jasaýǵa tapsyrys berýshi dep tanylǵan.
Izdeýde júrgen Kreml atynan Toqaevtyń "ulynyń qatysýymen túsirilgen feık geı-porno" jasaý týraly tapsyrma bergen.
BAQ málimetinshe, Orlın men Marsalek josparyn júzege asyrý úshin "bal qaqpanyn" jasamaq bolǵan. Bul ádisti arnaıy qyzmet ókilderi jıi qoldanady eken. Jospar boıynsha, ádis romantıkalyq nemese seksýaldy qarym-qatynas saıası maqsatta paıdalanylady.
Jazbaǵa súıensek, Marsalek geı-klýbtyń basshysymen suhbat jasaýy kerek bolǵan. Suhbatta klýb basshysy "Toqaevtyń ulynyń turaqty qonaq ekenin" aıtýy kerek edi.
Budan bólek, Marsalek "qazaqstandyq atom elektr stanııalaryna kıber shabýyl jasap, ıntımdik vıdeolardy jarııalaýdy jáne valıýtany quldyratýdy" usynǵan. Biraq nátıjesinde top bul jospardan bas tartqan. 2022 jyly Londondaǵy Qazaqstan elshiliginiń aldynda "jalǵan narazylyq akııasyn" ótkizýge toqtalǵan.
Aqorda málimetine sáıkes, Toqaevtyń ulynyń esimi – Tımýr. Ol Kemel Toqaev atyndaǵy qaıyrymdylyq qoryn basqarady.
