Prezident Qasym-Jomart Toqaev Aqordada halyqaralyq pän olimpiadalarynda üzdık nätije körsetıp, jüldelı oryndarǧa ie bolǧan oquşylar men studenttermen kezdestı, dep habarlaidy "Adyrna".
Kezdesuge halyqaralyq bılım dodalarynda el namysyn qorǧaǧan 21 laureat, sondai-aq olardyŋ ūstazdary men tälımgerlerı qatysty. Jas ziiatkerler fizika, himiia, biologiia, matematika, informatika, geografiia jäne lingvistika pänderı boiynşa ötken bedeldı olimpiadalarda Qazaqstan qorjynyna 6 altyn, 11 kümıs jäne 4 qola medal saldy.
Memleket basşysy elımızdıŋ qazırgı kezeŋın tarihi jaŋǧyru däuırı retınde baǧalap, soŋǧy uaqytta jüzege asyrylǧan auqymdy saiasi reformalarǧa toqtaldy.
«Bız bır el, bır halyq bolyp auqymdy reformalardy jüzege asyrdyq. Jaŋa Konstitusiiamyzdy qabyldadyq. Elımızdıŋ bas qūjatynda ǧylym men bılımge, innovasiiaǧa basymdyq berdık. Eŋ bastysy, jaŋa Konstitusiia öskeleŋ ūrpaqtyŋ igılıgı üşın jazyldy», – dedı Qasym-Jomart Toqaev.
Prezident sondai-aq Qazaqstan tarihynda alǧaş ret Qūryltai sailauy ötkenın atap öttı. Onyŋ aituynşa, sailau joǧary deŋgeide ūiymdastyrylyp, azamattar jaŋaru strategiiasyna qoldau bıldırdı.
«Keşe ǧana tarihymyzda tūŋǧyş ret Qūryltai sailauy öttı. Būl sailau sättı, mınsız ūiymdastyryldy dep aitsaq, qate bolmas. Osy mümkındıktı paidalanyp, bükıl halqymyzǧa azamattyq kemeldık tanytyp, jaŋaru strategiiamyzdy qoldaǧany üşın myŋ da bır alǧysymdy aitamyn», – dedı Prezident.
Memleket basşysy sailau barysynda jūmys ıstegen otandyq jäne halyqaralyq baiqauşylarǧa, sondai-aq Ortalyq sailau komissiiasynyŋ müşelerıne alǧys bıldırdı.
Aita keteiık, 2026 jylǧy 15 nauryzda ötken jalpyhalyqtyq referendumda qabyldanǧan jaŋa Konstitusiia 1 şıldeden bastap küşıne endı. Osyǧan bailanysty būrynǧy Mäjılıs pen Senat öz jūmysyn toqtatyp, deputattardyŋ ökılettıgı aiaqtaldy.
Jaŋa Konstitusiiaǧa säikes, Qazaqstanda bır palataly Parlament – Qūryltai qūryldy. Onyŋ qūramyna bes jyl merzımge sailanatyn 145 deputat kıredı.
23 tamyzda Qazaqstanda alǧaş ret Qūryltai deputattarynyŋ sailauy öttı. Ortalyq sailau komissiiasynyŋ aldyn ala mälımetıne säikes, sailauşylar tızımıne 12 623 289 azamat engızılgen. Olardyŋ 9 351 539-y nemese 73,8 paiyzy dauys beruge qatysty.
Qūryltaiǧa ötu üşın saiasi partiialar jalpy dauys sanynyŋ kemınde 5 paiyzyn jinauy tiıs boldy.
