Aqmola oblysynyń prokýrorlary Atbasar aýdany ákimdiginiń qurylys bólimi basshylaryna, «Prestıj Stroı 7» JShS men «Fýndamental» uıymdarynyń ókilderine qatysty 300 mln teńgeden astam qarajatty jymqyrý faktisi boıynsha tergeýdi aıaqtady, dep habarlaıdy "Adyrna" ulttyq portaly.
Óńirlik prokýratýranyń málimetinshe, bul qarajat 2021 jyly úkimet rezervinen bólingen. Olar Atbasar aýdanyndaǵy sý tasqyny qaýpi bar aımaqta turatyn 200 otbasyny kóshirý úshin eki 100 páterlik turǵyn úı salýǵa arnalǵan edi.
Kúdiktilerdiń áreketteri Qylmystyq kodekstiń 189-babynyń 4-bóligi boıynsha, ıaǵnı asa iri mólsherdegi múlikti talan-tarajǵa salý baby boıynsha saralanǵan. Atalǵan bap 12 jylǵa deıin bas bostandyǵynan aıyrý jáne múlikti tárkileý jazasyn qarastyrady.
Sot sankııasymen eki kúdikti qamaýǵa alyndy, al úshinshi qatysýshy úıqamaqqa jiberildi.
«Tergeý barysynda qylmystyq jolmen tabylǵan múlikter anyqtaldy. Olardyń qatarynda Astana men Almatydaǵy kommerııalyq jyljymaıtyn múlik, arnaıy tehnıka, qurylys jabdyqtary jáne banktik shottardaǵy 50 mln teńgeden astam qarajat bar. Barlyq tárkilengen múliktiń jalpy baǵalaý quny 335 mln teńgeden asty», – dep habarlady prokýratýra.
Sondaı-aq prokýrorlardyń málimetinshe, osy múliktiń bir bóligi jalǵa berilip, zańsyz tabys ákelgen.
«Osyǵan baılanysty bir kúdiktiniń áreketi qosymsha Qylmystyq kodekstiń 218-babynyń 3-bóligi boıynsha, ıaǵnı qylmystyq jolmen alynǵan aqsha men basqa da múlikti zańdastyrý retinde saralandy. Bul bap boıynsha 10 jylǵa deıin bas bostandyǵynan aıyrý jáne múlikti tárkileý jazasy kózdelgen», – dep tolyqtyrdy qadaǵalaý organy.
