Almatyda tanymal bloger ári kásipkerdiń kóligin alǵan 22 jastaǵy er adam kóz jumdy, dep habarlaıdy “Adyrna” ulttyq portaly.
Qaıǵyly oqıǵa 29 qazan kúni Aqsaı aýylyndaǵy "Sokol" avtodromynda bolǵan.
Trıýk oryndaý kezinde 22 jastaǵy jigit 45 jastaǵy júrgizýshi basqarǵan kóliktiń astynda qalyp qoıǵany anyqtaldy. Aýyr jaraqat alǵan jigit aýdandyq aýrýhanaǵa jetkizilgen. Alaıda, onda 30 qazan kúni esin jımastan kóz jumypty.
Halyq aldynda júrgen bloger qaıǵyly jaǵdaıǵa qatysty pikir bildirgen beınesi Tiktok jelisinde taraǵan. Bloger Beıbit Álibekov óziniń Lamborghini kóligin 22 jastaǵy jigittiń suraǵanyn aıtty.
«Menen kólik suraǵan Batyrhan Erjan degen jigitti eske túsireıik. Men áýelde oǵan bermedim. Ol kólikti qaıta-qaıta surady. Trıýk jasap, vıdeoǵa túsirgisi keletinin aıtqan. Birneshe ret suraǵannan keıin kóligimdi bergen bolatynmyn. Qaıǵyly oqıǵa trıýk jasaý kezinde oryn alǵan. Artynsha ol aýrýhanada kóz jumdy. Kóligimdi bermeýim kerek edi. Otbasy men jaqyndaryna qaıǵyryp kóńil aıtamyn", – delingen Álibekovtiń beınesinde.
Bul oqıǵaǵa Almaty oblysynyń polıııa departamenti túsinikteme berdi.
«29 qazanda avtodrom aýmaǵynda 22 jastaǵy jas jigit vıdeotúsirilim kezinde trıýk jasap jatqanda, abaısyzda 45 jastaǵy júrgizýshi basqarǵan kóliktiń dońǵalaqtarynyń astyna túsip qaldy. Sonyń saldarynan zardap shegýshi aýdandyq aýrýhanaǵa jatqyzyldy, ol 30 qazanda esin jımastan qaıtys boldy», – delingen habarlamada.
