Mańǵystaý oblysynda Kaspıı teńizi jaǵalaýynda myńdaǵan ıtbalyq qyrylyp qaldy, dep habarlaıdy "Adyrna" ulttyq portaly KTK-ǵa siltep.
Alǵashynda óli ıtbalyqtar Túpqaraǵan aýdanynda anyqtalǵan. Qazir olardyń ólekseleri Qaraqııa aýdanynan da tabylýda, Aqtaýda da ıtbalyqtyń ólekseleri anyqtalyp jatyr.
Qazirgi tańda 1034 ıtbalyqtyń ólimi qujat júzinde rastalǵan. Bul jaǵdaıdyń naqty sebebi áli anyqtalmaǵan.
«Gıdrobıologııa jáne ekologııa ınstıtýtynyń» dırektory Mırǵalı Baımuqanovtyń TASS agenttigine habarlaýynsha, mundaı kólemdegi ólim birinshi ret tirkelgen.
«Múmkin, óli janýarlardyń shyǵarylýy toqtamaıdy, óıtkeni bul bizdiń jaǵalaýǵa soqqan batys jelderimen baılanysty, jáne taǵy da ólekselerdiń tabylýyn kútýimiz kerek», — dedi ol. Baımuqanov qyrylýdyń sebebin ataýǵa qınalǵanyn aıtyp, bul úshin kóptegen salanyń qatysýy qajet ekenin aıtty. «Múmkin, bul keıbir lastaýshy zattardyń tógilýi, seısmıkalyq belsendilik sııaqty tabıǵı kataklızmder bolýy múmkin, ıaǵnı geologtar da pikirin aıtýy tıis. Janýarlar arasynda vırýs bolýy múmkin be ekenin anyqtaý úshin vırýsologtar da óz sózin aıtýy kerek», — dedi Baımuqanov.
Onyń aıtýynsha, árbir ıtbalyqtyń qyrylýy popýlıaııaǵa úlken zııan keltiredi.
«Bizdiń málimetterimiz boıynsha, 30-50 jasqa deıin jetetin ıtbalyqtar óte az. Ólip jatqan ıtbalyqtar kóbine orta jastaǵylar, olar popýlıaııanyń kóbeıýine úles qosar edi. Eger ıtbalyqtar osyndaı jasta qyrylyp qalsa, bul orny tolmas shyǵyn», — dep túıindedi Baımuqanov.
Kaspıı ıtbalyǵy Qazaqstannyń Qyzyl kitabyna engizilgen. Ǵalymdardyń baǵalaýy boıynsha, qazirgi ýaqytta Qazaqstannyń Kaspıı teńizindegi aýmaǵynda 240 myńnan astam ıtbalyq tirshilik etedi.
