Búgin Moldovada prezıdent saılaýynyń ekinshi kezeńi ótip jatyr, dep habarlaıdy «Adyrna» ulttyq portaly BBC-ge silteme jasap.
Saılaý naýqanynyń fınalyna qazirgi memleket basshysy Maııa Sandý men 2021 jyly Sandýdyń ózi qyzmetinen daýly túrde shettetilgen eldiń burynǵy bas prokýrory Aleksandr Stoıanoglo shyqty.
Eki apta buryn ótken birinshi týrda saılaý favorıti sanalǵan Sandý 42,5% daýys jınady. Moldavııalyqtardyń 26%-ǵa jýyǵy onyń qarsylasyna daýys berdi.
Birinshi týrdaǵy osyndaı nátıjelerge qaramastan, baqylaýshylar Maııa Sandýdy sheshýshi daýys berýdiń favorıti dep ataýdan saqtanýda. Sebebi onyń elektoratty keńeıtý múmkindigi óte az, al antıreıtıngi kerisinshe shamamen 50%-dy quraıdy.
Moldova – parlamenttik respýblıka, jáne resmı túrde prezıdenttiń sımvolıkalyq ókilettikteri ǵana bar. Alaıda Sandýǵa kelgende bul ereje jumys istemeıdi. 2021 jylǵy saılaýda onyń «Áreket jáne yntymaq» partııasy parlamentte absolıýtti kópshilikke ıe boldy, sondyqtan ol is júzinde Dorın Rechan úkimetiniń jumysyn qadaǵalaıdy. Sonymen qatar, qazirgi naýqandy kóptegen baqylaýshylar kelesi jyly ótetin asa mańyzdy parlamenttik saılaýǵa daıyndyq retinde qarastyryp otyr.
Prezıdent saılaýynyń birinshi týrynda shamamen 1,5 mıllıon saılaýshy qatysqan. Sońǵy aptada Moldova quqyq qorǵaý organdary búkil el boıynsha saılaýshylardy satyp alý shemalaryna baılanysty júzdegen tintý júrgizdi. Alaıda, moldavııalyq bıliktiń aıtýynsha, bul faktordyń áserin tolyǵymen joıý múmkin bolmaǵan.
Moldovada eki myńǵa jýyq saılaý ýchaskesi tańǵy saǵat jetide ashylyp, keshki toǵyzǵa deıin jumys isteıdi. Shetelde taǵy 234 ýchaske ashyldy. Olar daýys berý nátıjesine áser etýi múmkin mańyzdy faktorlardyń biri bolmaq.
Prezıdenttik saılaýdyń birinshi týrynda sheteldegi moldovandardyń 70%-dan astamy Maııa Sandýǵa daýys bergen. Osy saılaýshylar sanatynyń qosymsha mobılızaııasy onyń qaıta saılaný múmkindigin aıtarlyqtaı arttyrýy múmkin.
Moldovada ekzıtpol ótkizilmeıdi. Ekinshi týrdyń nátıjeleri týraly aqparat daýystar sanalǵan soń, saılaýdan keıingi túnde jarııalana bastaıdy.
