Ulytaý oblysynda birden 11 ákimge qatysty is qozǵaldy, dep habarlaıdy “Adyrna” ulttyq portaly.
QazTAG málimetinshe bul aqparatty óńirlik qadaǵalaý organynyń baspasóz qyzmeti habarlady.
"Ulytaý oblysynyń mamandandyrylǵan tabıǵatty qorǵaý prokýratýrasy ekologııalyq zańnamany qoldanýdy taldap shyqty. Nátıjesinde, 66 I jáne II sanattaǵy operatorlardyń óndiristik ekologııalyq baqylaý nátıjeleri týraly esepterdi qorshaǵan ortany qorǵaý salasyndaǵy ýákiletti organǵa tapsyrmaýynyń 125 faktisi anyqtaldy (Ekologııalyq kodekstiń 184-babynyń talaptaryn buzý). Olardyń arasynda jer qoınaýyn paıdalanýshylar, kommýnaldyq kásiporyndar, aýyldyq okrýg ákimdikterine tıesili qatty turmystyq qaldyqtar polıgondary jáne basqalary bar. Bul óz kezeginde, ýákiletti organǵa óńirdegi ekologııalyq jaǵdaıdy obektıvti túrde baǵalaýǵa múmkindik bermedi. Osy faktiler boıynsha prokýratýra Ulytaý oblysynyń Jańaarqa aýdanyna qarasty aýyldyq okrýgterdiń 11 ákimine qatysty 20 ákimshilik quqyq buzýshylyq týraly is qozǵady", – delingen sársenbi kúngi habarlamada.
Qylmystyq ister QR ÁQBtK-niń 327-1-baby (Qazaqstan Respýblıkasynyń ekologııalyq zańnamasynda kózdelgen mindetti málimetterdi usyný talaptaryn buzý) boıynsha qozǵaldy.
"Qazirgi ýaqytta prokýratýranyń qadaǵalaý aktisi boıynsha ekologııa departamenti qalǵan tabıǵat paıdalanýshylardy ákimshilik jaýapkershilikke tartý boıynsha sharalar qabyldaýda", – delingen habarlamada.
Sonymen qatar, Konstıtýııalyq "Prokýratýra týraly" zań talaptaryn buzǵany úshin Ulytaý oblysy ekologııa departamentiniń, veterınarııa, kásipkerlik jáne ónerkásip basqarmalarynyń basshylary QR ÁQBtK-niń 664-baby (sottyń jeke qaýlysyn, prokýrordyń, tergeýshiniń nemese anyqtaýshynyń uıǵarymyn oryndaý boıynsha sharalar qabyldamaý), 665-baby (prokýrorǵa, tergeýshige jáne anyqtaý organyna, sot oryndaýshysyna kelmeý) jáne 666-baby (prokýrordy habardar etpeý nemese ýaqytyly habarlamaý) boıynsha jaýapkershilikke tartyldy.
"Búgingi kúni aıypty tulǵalar salynǵan jalpy somasy 4,6 mln teńge aıyppuldy tolyq kólemde tóledi", – dep tolyqtyrdy prokýratýra.
Eske sala ketsek, Ulytaý oblysynyń birinshi ákimi Berik Ábdiǵalıev taıaýda qyzmetinen bosaǵan bolatyn.
