Sot Air Astana áýe kompanııasyn 12 jastaǵy qyzdy ushaqqa otyrǵyzbaǵany úshin onyń anasyna 5 mln teńge kóleminde moraldyq ótemaqy tóleýge mindettedi, dep habarlaıdy “Adyrna” ulttyq portaly.
«Sot Air Astana-ny Zereniń anasyna 5 mıllıon kóleminde moraldyq ótemaqy tóleýge mindettedi. Biz jeńdik. Balanyń anasy ekeýmiz oryn alǵan artyq tapsyrysty dáleldeý úshin uzaq jol júrdik. Bastapqyda bul is qoǵamda rezonans týdyrmaıynsha, bizdiń shaǵymymyzǵa mán berilgen joq», - dedi advokat Danılhan Shaǵataev óziniń Telegram-arnasynda.
20 shildede Zere jáne Záýre atty egiz qyz Amerıkadan elge qaıtqan. Olar senimdi ókilmen, bir top balamen saıahattaǵan. Qaıtarda Astana arqyly tranzıtpen Oralǵa ushýy kerek bolǵan, biraq Zereni kompanııa bortqa kirgizbeı, jalǵyz ózin tastap ketken. Sonyń saldarynan egizdiń syńary Astana áýejaıynda jalǵyz qalyp qoıǵan. Al senimdi ókil basqa balalarmen ushyp ketken.
Áýejaıdaǵy beınebaqylaý kameralarynyń jazbalarynan 12 jastaǵy qyzdyń 3 saǵat jylap turǵanyn kórýge bolady.
Osy oqıǵadan keıin FlyArystan basshysy balanyń anasymen kezdesip, keshirim surap, ótemaqy retinde 4 mıllıon teńge usynǵan. Biraq áıel odan bas tartyp, sotqa júgingen.
FlyArystan áýe kompanııasy syıymdylyǵy 188 oryndyq ushaqty 180 oryndyq bortqa aýystyrǵany anyqtaldy. Nátıjesinde Zere 181-jolaýshy retinde tirkelip, ushaqqa otyra almaǵan. 19 jáne 20 kúni ushýy kerek reıs jolaýshylary da osy bortqa otyrǵyzylǵan. Nátıjesinde kámeletke tolmaǵan jolaýshy áýejaıda qalyp qalǵan.
Áýe kompanııasy balany qala ishindegi qonaqúıge ornalastyrýdy usynǵan. Alaıda anasy balanyń jalǵyz ózi qonaq úıge barýyna qarsy bolypty. Óıtkeni bala zańdy ókilderinsiz tirkele almaıdy. Artynsha anasynyń ótinishi boıynsha, áýejaıǵa balanyń týysy kelgen. Polıııa qyzmetkeri men týysynyń málimetinshe, áýe kompanııa ókilderi balanyń týysy jolaýshy bolmaǵandyqtan qonaqúı berýden bas tartqan. Sotta áýe kompanııa ókilderi qonaqúımen kelisim boıynsha tek jolaýshylar ǵana tegin qala alatynyn málimdedi.
Eske salaıyq, buǵan deıin FlyArystan áýekompanııasy 12 jasar qyzdy reıske mingizbeı, jalǵyz ózin ózge qalada qaldyryp ketkeni habarlanǵan. Oqıǵadan keıin qyzdyń anasy áýekompanııanyń qyzmetine narazylyq bildirgen bolatyn.
