Týrızm jáne sport mınıstri Erbol Myrzabosynov Bekzat Sattarhanov pen Denıs Tenniń anasymen kezdesti, dep habarlaıdy “Adyrna” ulttyq portaly.
Astanada mınıstr dańqty boksshy, Sıdneı Olımpıadasynyń chempıony Bekzat Sattarhanovtyń aıaýly anasy Syrlykúl Sattarhanovany jáne álemge Qazaqstandy tanytqan mánerlep syrǵanaýshy, Sochı Olımpıadasynyń qola júldegeri Denıs Tenniń anasy Oksana Tendi qabyldady.
Kezdesý barysynda Erbol Myrzabosynov el baıraǵyn kókte jelbiretip, Ánuranymyzdy tartysty básekelerde shyrqatqan sańlaqtardyń esimi el esinde ekenin jetkizdi. Olardyń rýhyn ulyqtaý jolynda qos ananyń aıanbaı eńbek etip júrgenin atap ótti.
“Halqymyz "Alyp anadan týady" dep beker aıtpaǵan. Shynynda da, adam boıyndaǵy asyl qasıet pen taýdaı talap ananyń aq sútimen darıdy. Ana balasyna bergen tárbıesi men sheksiz mahabbaty onyń bolashaǵyna jarqyn jol ashady. Sizder uldaryńyzdy sport úıirmesine qarshadaıynan jetelep aparyp, chempıon atanýy úshin barlyq jaǵdaıdy jasadyńyzdar. Sańlaqtarymyz aramyzdan alystap ketse de, olardyń rýhyn ulyqtaý, esimin el jadynda máńgi saqtaý jolynda aıanbaı eńbek etip júrgenderińizge kýámiz. Batyrlarymyzdyń aty óshpeı, áli kúnge deıin jas jetkinshekterdiń kýmıri bolyp kele jatqany eń aldymen, sizderdiń arqalaryńyz", - dedi Erbol Myrzabosynov.
