Qaztalov aýdanynyń ortalyǵyna qashyq ornalasqan Qaıyńdy aýylynda mádenıet úıiniń ǵımaraty paıdalanýǵa berildi. Mádenıet úıiniń jalpy aýdany 3600 sharshy metrdi quraıdy. Osy ýaqytqa deıin aýdan ákiminiń halyqpen kezdesýinde qaıyńdylyqtar aýylǵa jańa mádenıet úıiniń qajet ekendigi jóninde máseleni jıi kóterip júrdi. Halyqtyń talap-tilegi oryndalyp, zaman talabyna saı rýhanı orda esigin aıqara ashty.
Mádenıet úıiniń ashylý saltanatyna qatysqan óńir basshysy Narıman Tóreǵalıuly aýyl halqyn jańa nysannyń ashylýymen quttyqtap, jyly lebizin bildirdi.
— Oblysymyzda birqatar ınfraqurylymdyq jobalar men memlekettik baǵdarlamalar júzege asýda. Oblys ortalyǵy men aýdandarda bilim ordalary men mádenıet úıleriniń qurylystary júrgizilýde. Qaıyńdy aýylyndaǵy mádenıet úıiniń jobasyn ózge de aýyldar men eldi mekenderde júzege asyramyz. Aldaǵy ýaqytta Kaztalov-Qaıyńdy baǵytyndaǵy jol qurylysy máselesin de qarastyratyn bolamyz. Mádenıet úıinen elge belgili óner maıtalmandary qanat qaǵady degen senimdemin, — dedi oblys ákimi.
«Aýyl — el besigi» baǵdarlamasy aıasynda salynǵan mádenıet oshaǵynyń qurylys jumystaryn «Daren Stroı Servıs» JShS júrgizdi. 150 oryndyq kórermen zaly, aýyldyq kitaphana ornalasqan ǵımaratta 5 adam jumyspen qastylyp otyr. Qaýipsizdik máselesi de nazardan tys qalmaı, ishki jáne syrtqy beınebaqylaý kameralary ornatylǵan.
Nysannyń saltanatty ashylýynda sóz alǵan aýyl turǵyny, sala ardageri Toqjan Oraz jergilikti atqarýshy organdarǵa halyq atynan alǵysyn aıtty.
— Búgin aýylymyzda kópten kútken qýanysh. Aq túıeniń qarny jarylyp, mádenıet úıi halyqqa esigin aıqara ashqaly otyr. «Kóp tilegi kól» deıdi dana halqymyz. Aýylǵa mádenıet úıiniń qajet ekeni jıi kóterilip júrgen másele edi. Búgin jańa mádenıet oshaǵynyń ashylý saltanatyna kýá bolyp otyrmyz. Prezıdentimizdiń ár bastamasyn muqııat qarap otyramyz. Sońǵy joldaýynda atap ótken elimizdi damytýdaǵy bastamalaryn tolyǵymen qoldaımyz. Atom elektr stanııasyn salý táýelsiz memleket retinde damýdyń birden bir joly dep bilemiz. Aýylymyzda mádenıet oshaǵy boı kóterip jańa turǵyn úıler salynýda, aldaǵy ýaqytta aýyldyń ishki joldary da jóndeletin bolady. Halyqtyń únine qulaq túrgen jergilikti atqarýshy organdarǵa aýyl halqy atynan alǵysymdy bildiremin! Ultymyzdyń rýhyna qalqan bolar mádenıetimiz asqaqtaı bersin, — degen aýyl turǵyny oblys basshylyǵyna Kaztalov aýylyna qatynaıtyn tike joldyń salynýyna yqpal etýin surady.
Mádenıet oshaǵynyń lentasyn oblys ákimi Narıman Tóreǵalıev, aýdandyq máslıhat tóraǵasy Sársenbaı Moldashev, mádenıet salasynyń ardageri Sansyzbaı Nábıev qıdy. Jańa mádenıet oshaǵyna oblys ákiminiń atynan 3 kondııonerdiń sertıfıkaty tabystaldy.
