30 sáýir aýdan ákimi Aslanbek Sarqulovtyń qatysýymen memlekettik materıaldyq rezervten aýdanymyzǵa berilgen tehnıkalardy tabystaý rásimi ótti, dep habarlaıdy "Adyrna" ulttyq portaly.
Qazaqstan halyqtarynyń birligi kúni merekesi qarsańynda ótken saltanatty is-sharaǵa aýdan ákiminiń orynbasarlary, aýdandyq máslıhat tóraǵasy Sarsenbaı Moldashev, aýdandyq qoǵamdyq keńes tóraǵasy Maǵaýııa Esmaǵulov, aýdandyq ardagerler keńesiniń tóraǵasy Júsip Shakýov jáne aýdan turǵyndary qatysty.
Sý tasqyny kezinde aýdanymyzdyń birqatar aýyldary men eldimekenderi taza aýyz sýsyz qalǵan edi. Jergilikti atqarýshy organdar is-qımylynyń nátıjesinde sý tasqyny qaýpi seıildi.
—Kóktemgi sý tasqyny saldarynan Kaztalov aýdanynyń aýyldary men eldimekenderi taza aýyz sýsyz qalýyna baılanysty memlekettik materıaldyq rezervten 2 kamaz avtokóligi bazasyndaǵy sý tazalaǵysh, 1 gazel avtokóligi bazasyndaǵy sý tazalaǵysh mashına (jyljymaly «Taza sý»fıltrli qondyrǵysy) jáne sý joq eldi mekenderge sý tasymaldaýǵa qajetti 2 dana sý tasymaldaýshy (vodovoz) kóligi alyndy. Sonymen qatar kóktemgi sý tasqyny saldarynan oblystyq jáne aýdandyq mańyzy bar avtojoldarda sý jyrý faktileri oryn alǵan bolatyn. Osy avtojoldardy qalpyna keltirýge aýdanymyzǵa memlekettik materıaldyq rezervten qajetti 1 dana aýyr avtogreıder bólinip, paıdalanýǵa berilip otyr. Qoldaý kórsetken QR Tótenshe jaǵdaılar mınıstrligine jáne oblys ákimdigine aýdan turǵyndary atynan rızashylyǵymdy bildiremin, - dedi aýdan ákimi.
Kaztalov aýdany ákimdiginiń baspasóz qyzmeti
