Elimizde 2019 jyldan beri 24-26 tamyz - Týǵan jer kúni atap ótiledi, dep habarlaıdy "Adyrna" ulttyq portaly.
Ulttyq merekege oraı álıhantanýshy-ǵalym, halyqaralyq jýrnalıst, fılologııa ǵylymdarynyń kandıdaty, "Alash" ǵylymı-zertteý ınstıtýtynyń dırektory Sultan Han Aqquly barsha qazaqstandyqtardy merekemen quttyqtady.
"Sizderdi Ult qundylyqtaryn saqtaý men nasıhattaýǵa baǵyttalǵan Qazaq kúntizbesiniń aıshyqty kúni 24-26 tamyz - Týǵan jer kúnimen quttyqtaımyn!
1847 jyly Qazaq handyǵy birjola ydyrap, tarıh sahnasynan túsýinen týra 70 jyl ótken 1917 jyldyń jeltoqsanynda Alash Respýblıkasy ataýymen týy qaıta kóterilgen Qazaq ulttyq memleketiniń terrıtorııasy 9 oblys, bir gúberne, Zakaspıı oblysynyń Mańǵyshlaq, Altaı óńiriniń Bııski, Zmeınogor jáne Barnaýyl oıazdaryn qamtyp, jalpy aýmaǵy 3,45 mln sharshy shaqyrymdy qurady.
Qaıta jańǵyrǵan ulttyq memlekettiń osy jerin Álıhan Bókeıhan odan 7 jyl buryn - 1910 jyly Sankt-Peterborda jaryq kórgen áıgili «Qazaqtar» atty tarıhı ocherkinde aıqyndap qoıǵan bolatyn. 1917 jyldyń 12 jeltoqsanynda (qazirgi kúntizbe boıynsha 25 jeltoqsan) II Jalpyulttyq Qazaq-Qyrǵyz quryltaıy osy oblys-oıazdardy Alash Respýblıkasynyń zańdy jer aýmaǵy dep jarııalady.
Alash Respýblıkasyn joıyp, ornyna Qazaq avtonomııalyq keńestik soıalıstik respýblıkasy bolyp qaıta qurylatyn 1920 jyldyń tamyz aıynda «Alash» arysy Álıhan Bókeıhan Ahmet Baıtursynuly men Álimhan Ermekulyn alǵa salyp, keńes ókimetiniń kósemi V.I. Lenınniń aldynda osy oblys-oıazdar qazaq halqynyń ata-babadan qalǵan tarıhı menshikti jeri ekenin dáleldep, Táýelsiz Qazaqstan Respýblıkasynyń qazirgi jer aýmaǵyn – terrıtorııasyn qorǵap, bekitip aldy.
Mine bıyl qazirgi memlekettik shekaramyzdyń bekitilgenine 104 jyl tolyp otyr.
Alash azamattary! Jerimiz túgel, aspanymyz ashyq, elimiz tynysh bolsyn!" - dedi óz quttyqtaýynda.
