Áskerı qyzmet – jaýapty mindet! Aldymen Otanǵa degen sheksiz qurmet! Bizdiń búgingi keıipkerimiz mamandyǵyn maqtan tutatyn batalon komandıri podpolkovnık Baǵdat Mambetov.
Áskerı adam bolý onyń bala kúngi armany, qııaly búginde abyroıly qyzmeti. Baǵdat Mambetov Syr óńiriniń týmasy.1988 jyly Qyzylorda qalasynda dúnıege kelgen. Ákesi mehanık, al anasy ulaǵatty ustaz. Ata-ana tárbıesin kórip, bergen bilimdi boıyna sińire alǵan keıipkerimiz óziniń úlken ómirinde de aıtýly jetistikterge jetýde. Tal besikten alǵan tárbıe bıik belesterdi baǵyndyrýǵa kómegin tıgizip keledi.
Otanǵa adal qyzmet etý árbir azamattyń paryzy. Qaı zamanda bolmasyn eldi jaýdan saqtaǵan ata-babamyzdyń da ustanymy bul. Dál osy boryshty adal ótep júrgen podpolkovnık Baǵdat Mambetov áskerı saladaǵy mektebin 2005 jyldan bastaǵan. Balalyq armanyn júzege asyrý maqsatynda mektepti aıaqtaı salysymen Petropavl joǵary ýchılıesine oqýǵa túsedi. Onda ol tórt jyl bilim alyp, 2009 jyly ofıer mamandardyń ustahanasyna aınalǵan áskerı oqý orny ıntstıtýt bolyp qaıta qurylǵan kezde oqýyn támámdaıdy. Alǵashqy ofıerlik eńbek jolyn Óskemen qalasynda ornalasqan 5518 áskerı bóliminen bastaıdy. 2009-2018 jyldar aralyǵynda vzvod komandıri, rota komandıri, batalonnyń shtab bastyǵy jáne áskerı bólim basqarmasynda ásker qyzmeti jáne áskerı qyzmet qaýipsizdiginiń bastyǵy laýazymynda bolǵan. Al 2018-2022 jyldar aralyǵynda Qyzylorda qalasyndaǵy 5547 áskerı bóliminde ásker qyzmeti jáne áskerı qyzmet qaýipsizdiginiń bastyǵy boldy. Odan keıin qyzmet babymen alyp megapolıske qonys aýdarady. 2022 jyly Keńes Odaǵynyń batyry, gvardııa polkovnıgi, Baýyrjan Momyshuly atyndaǵy 5571 áskerı bóliminiń 3 jedel maqsattaǵy batalon komandıri qyzmetine taǵaıyndalady. Sodan beri osy qyzmetti abyroımen atqaryp keledi. Qaramaǵynda 400-ge jýyq áskerı qyzmetshi bar. Túsine bilgen adamǵa batalon komandıri bolý qınynnyń qıyny. Aldymen úlken jaýapkershilikti, eńbekti, qajyr-qaıratty, tózimdi talap etedi. Máselen, otbasynda ata-anasyna, jaryna, bala-shaǵasyna jaýapty bolsa munda árbir áskerı qyzmetshige jaýapty.
– Ózińiz joǵaryda aıtyp ótkendeı jalpy batalon komandıri bolǵannan keıin bizdiń jaýapkershilik óte joǵary. 400-den asa adamnan turatyn jeke quramdy basqarý da ońaı emes. Ár adamǵa erekshe qarym- qatynas qalyptastyrýmyz qajet. Máselen, jańadan kelgen áskerı qyzmetshi birden áskerı adam bolyp kelmeıdi. Biz ol adamdy áskerı ómirge beıimdeý arqyly, kúndelikti tártip pen jaýyngerlik qyzmetterdiń arqasynda oılaǵan nátıjege qol jetkize alamyz. Sondaı –aq, ár sarbaz da bir-bir úıdiń kenjesi, erkesi ıa bolmasa jalǵyzy bolyp tabylady. Mundaı kezde tártipke úırengenshe júıeli túrde jeke-jeke jumys jasaımyz.
Bul da bizdiń kásibı sheberligimizdiń bir kórinisi bolmaq. Eń bastysy keýdedegi Otanǵa degen patrıottyq sezimin arttyrý. Baýyrjan Momyshuly aıtpaqshy «Tártipke baǵynǵan qul bolmaıdy». Meniń tańdaǵan bul mamandyǵym qazirgi kúni maqtanyshyma aınaldy. Kúndelikti tártip pen talaptyń arqasynda ózimniń otbasylyq ınstıtýtymdy da jaqsy qalyptastyryp kelemin. Otanyma, otbasyma adal qyzmet etip júrgenimdi maqtan tutamyn, - deıdi podpolkovnık Baǵdat Mambetov.
Iá, Baǵdat Mambetovtyń mamandyǵyna degen adaldyǵyn, erekshe qurmetin baıqadyq. Bul qyzmet qatelikti keshirmeıdi. Belgilengen áskerı jarǵy boıynsha qatań talaptar qoıylady, soǵan jeke quram baǵynady. Áskerı salada óz aldyna qıyndyqtary kezdesse de syr bildirmeı adal qyzmetin atqaryp júr.
Eńbek qana bárin jeńbek. Dál osy ustanymdy ustanatyn keıipkerimiz jas jaýyngerlerge de osy prınıppen ómir súrý kerektigin aıtady. Áskerı ómirdiń az ǵana aýyrtpashylyǵyna shydas berip adal qyzmet etse keıin zeınetin kóretinine kámil senimdi. Ár kez shynshyl, batyl, batyr bolýǵa keńes beredi. Sol kezde ǵana ómirde belgilengen márege qol jetkizýge bolady deıdi batalon komandıri Baǵdat Mambetov.
Aıaýlym Madıkanova
