2024 jylǵy Parıj Olımpıadasynda grek-rım kúresinen fınaldyq kezeńge joldama alǵan qazaq balýany Demeý Jadyraevtyń anasy Kúlıpa Bıjanova ulymen baılanysqanyn, onyń halqyna alǵys aıtqanyn málimdedi, dep habarlaıdy “Adyrna” ulttyq portaly Kazinform saıtyna siltep.
“Ulym 3 synyp oqyp júrgen kezinde kúreske bardy. Sportqa ózi talpynyp, ózi qatysty. Ol kezde bulaı Olımpıadaǵa barady dep oılamadym. Balamnyń talaby men jigeri myqty boldy. Aldymen aýylda shynyqty. 6 synyptan keıin Taldyqorǵandaǵy Sportta daryndy balalarǵa arnalǵan mektep-ınternatynda oqydy. 11 synypty sol jerde bitirip, aldymen QazUÝ-ǵa, odan keıin Sport jáne týrızm akademııasyna oqýǵa tústi”, — dedi sportshynyń anasy.
Sondaı-aq Demeý Jadyraevtyń anasy keshegi ótken beldesýden keıin balasymen sóıleskenin aıtyp, onyń otandastaryna degen aq tilegin jetkizdi.
“Parıj aldynda oqý-jattyǵýyna baryp kelgennen keıin balamdy aýyldan aq jol tilep shyǵaryp saldym. Jerlesimiz Nurbaqyt Teńizbaevtiń jolyn bersin degen tilegimdi aıttym. Sol aǵalaryna qarap, Olımpıadada jeńiske jetýdi bala kezden armandady. Talaı qıynshylyqty basynan ótkerdi. Endi balamdy til-kózden saqtasyn, buıyrsa elge altynmen oralsyn. Keshe Parıjden habarlasyp, sóılestik. «Endi beldesetin bir adam qaldy. Qoldap jatqan halqyma alǵys aıtamyn» degen”, — dedi Kúlıpa Bıjanova.
Aıta keteıik, keshe 6 tamyz kúni Demeý Jadyraev jartylaı fınalda Ázerbaıjan ókili Sanan Sýlaımanovty jeńip, fınalǵa shyqty. Otandasymyz búgin japondyq Nao Kýsakamen altyndy sarapqa salady.
