Telejúrgizýshi Láılá Sultanqyzy atqa minýge qumartyp, jıi shabýdy ádetke aınaldyrǵan qyzdarǵa eskertý jasady, dep habarlaıdy "Adyrna" ulttyq portaly.
Medıa maman jelidegi paraqshasynda jazba jarııalady.
“Sońǵy eki kúnde Erkejanmen myń ret habarlasqan shyǵarmyn. Tipti túsimde de jaǵdaıyn surap júrmin. Atqa minýdi nemese shabýdy jaqsy kóretin qyzdar, jaqyndańdar! Bulaı jasaýǵa bolmaıtynyn aıtyp beremin. Erkejannyń fotosyn kórgende qatty shoshyp kettim. Osydan birneshe kún buryn dostarymen atqa shabýǵa barǵan. Sol jerde qulap, jaraqat aldy. Mıdyń shaıqalýy dıagnozy qoıyldy. Ota jasaldy. Birinshi ret atpen shaýyp turǵan joq. Buryn da baryp júretinin biletin edim. Osy joly qatty qulap, bárimizdi qorqytty”, – dedi telejýrnalıst.
Sonymen qatar medıa ókili búginde atqa shabý trendke aınalǵanyn atap ótti.
“Qazir qyz balalarynyń atqa minýi nemese shabýy keń taraldy. Astananyń ózinde birneshe oryndar bar. Erkejan da birneshe ret baryp júrgen ortalyǵyna baryp, shaýyp júrgen atyna mingen. Qolhat jazyp, jaýapkershilikti ózine alǵan. Meniń aıtqym kelgeni, densaýlyqqa paıdaly bolǵanymen, qaýipsizdik birinshi orynda. Bastysy – qaýipsizdik pen densaýlyq. Atqa minerde kıetin baskıimi, beline taǵatyn, baılaıtyn dúnıeleri bolýy kerek. Odan keıin tekserilgen atqa otyryńyzdar. Odan keıin zańdy jumys isteıtin ortalyqqa barǵan durys”, – dep keńes berdi jýrnalıst.
