Qazaqstan ulttyq quramasynyń bas bapkeri Stanıslav Cherchesov Astanada alǵash ret baspasóz májilisin ótkizdi, dep habarlaıdy "Adyrna" ulttyq portaly Sport24-ke siltep.
27 maýsym kúngi jıyn barysynda bapkerge jýrnalıst Nursultan Qurman qazaqsha suraq qoıǵan bolatyn. Alaıda Stanıslav Cherchesovke BAQ ókiliniń qoıǵan saýaly unamaǵan.
BAQ betterinde taraǵan aqparatta Nursultan Qurmannyń qazaq tilinde joldaǵan alǵashqy saýaldaryn QFF prezıdenti Ádilet Barmenqulov orysshaǵa aýdaryp berip otyrǵan.
«Nege oryssha qoımaısyz? Men qazir sizge óz ana tilimde jaýap bersem ne bolady? Biraq ol kezde eshkim túsinbeıdi. Osynyń aldynda qazaqsha saýalyńyzdy federaııa prezıdenti aýdaryp berdi, endi ol kisini qaıta-qaıta áýrelemeımin ǵoı. Ótinish jasaý birinshi ret tegin bolady, al keıinnen ondaı júrmeıdi», – dedi reseılik bapker Stanıslav Cherchesov.
Jýrnalıst ári bloger Nursultan Qurman Metaratings basylymyna qazaq tilindegi suraqqa baılanysty kıkiljińnen keıin fýtboldan Qazaqstan ulttyq quramasynyń jańa bas bapkeri Stanıslav Cherchesovti keshirgenin aıtty. Qurmannyń aıtýynsha, Stanıslav Cherchesov ózin burynǵy Magomed Adıevten múldem basqasha ustaıdy.
«Múmkin, Cherchesov joldan sharshaǵan shyǵar, biraq ol jýrnalıstermen sóılesýdiń alǵashqy mınýttarynan-aq olarǵa qarsy shyqty. Biz mundaı minez-qulyqqa úırenbegenbiz jáne mundaı qarym-qatynas unamaıdy. Sonymen, Cherchesovke, bizdiń komandaǵa sáttilik tileımin!Bul jolǵy jaǵdaıdy ázil retinde qabyldaýǵa bolady. Qatelik jasamaıtyn adam joq. Men ony bul qateligi úshin keshiremin. Kelesi joly mundaı jaǵdaı qaıtalansa, biz basqa sharalardy qabyldaımyz», - dedi Qurman.
Aıta keteıik, jaqynda bapker Qazaqstan ulttyq quramasynyń bas bapkeri Magomed Adıevti almastyrǵan bolatyn.
