Almatyda Muhtar Áýezov atyndaǵy Qazaq ulttyq drama teatrynda memleket jáne qoǵam qaıratkeri Murat Muhtaruly Áýezovpen qoshtasý rásimi ótti, dep habarlaıdy "Adyrna" ulttyq portaly QazAqparatqa siltep.
Qazaqstandyq qoǵam qaıratkeri, mádenıettanýshy Murat Áýezovtiń qoshtasý rásimine mınıstrlik pen ákimdik ókilderi, senat depýtattary, qoǵam qaıratkerleri men qazaq zııalylary, marqumnyń týǵan-týystary qatysty. Is-shara barysynda Memleket basshysynyń kóńil aıtý hatyn Prezıdent keńesshisi Málik Otarbaev oqydy.
"Asa kórnekti memleket jáne qoǵam qaıratkeri, mádenıettanýshy, shyǵystanýshy ǵalym, birinshi dárejeli Barys ordeniniń ıegeri, dıplomat Murat Muhtaruly Áýezovtiń dúnıeden ótýine baılanysty qaıǵylaryńyzǵa ortaqtasyp, kóńil aıtamyn. Murat Muhtaruly ult rýhanııatynyń alǵa basýyna, qazaq ǵylymynyń kókjıegin keńeıtýge bar sanaly ǵumyryn arnaǵan zııaly, parasatty tulǵa edi. Qazaq ádebıeti men mádenıetin, tarıhyn tereń zerdelep, sonda ólsheýsiz mura qaldyrdy. Qazaqstannyń halyqaralyq dárejedegi bedeliniń artýyna óziniń saıası qoǵamdyq isterimen zor úles qosty", - delingen Memleket basshysynyń kóńil aıtý hatynda.
Qoshtasý rásiminde memleket jáne qoǵam qaıratkeri Muhtar Qul-Muhamed Múrat Áýezov pen ákesi Muhtar Áýezovtiń arasyndaǵy erekshe baılanysqa toqtaldy.
"Asyldyń synyǵy desek te, tulpardyń tuıaǵy desek te jarasatyn asyl adammen qoshtasýǵa kelip otyrmyz. Muhtar Áýezovtiń 4 uly bolǵan. Birinshisi, Shoqan degen balasy 1 jasynda shetinep ketken. Odan keıin Lenıngradta oqyp júrgen kezde Valentına jeńgemizden týǵan Eldes degen bala da 1 jasynda qaıtys bolǵan. Odan keıin Eldar degen balasy 3 jasynda shetinep ketedi. Uldan tuqymsyz qalam ba dep júrgende Fatıma jeńgemizben kóńil qosyp, dúnıege Murat keledi. Muratty anasynyń qursaǵyna bitken kúnnen bastap aıalaǵan adam - Muhtar Áýezov. «Altyn balam» dep hat tanymaǵan balasyna talaı hat jazǵan. Mine sol altyn bala ákesiniń senimin aqtady", - dedi Muhtar Qul-Muhamed.
Aıta keteıik, 14 maýsym kúni mádenıettanýshy, ǵalym, dıplomat, memleket jáne qoǵam qaıratkeri, Muhtar Áýezovtiń uly Murat Áýezov ómirden ótkenin habarlaǵan bolatynbyz.
