Búgin, 12 maýsym kúni ótken májilis otyrysynda depýtat Nartaı Sársenǵalıev elde oryn alǵan zańǵa qaıshy sońǵy jaıttardyń qaýiptiligin atap, ishki ister mınıstrine saýal joldady, dep habarlaıdy “Adyrna” ulttyq portaly.
Depýtat Atyraý qalasynda bolǵan kisi ólimi men Almaty oblysyndaǵy kókke oq otqandardyń bassyzdyǵyn atady. Mınıstrlikten atalmysh jaıttardy qatań baqylaýǵa alýyn surady:
“Úılený toıynyń qurmetine serýenge shyqqandar avtomat pen tapanshadan ońdy-soldy oq jaýdyryp, qarýdy kezekpen alyp oq atyp qyzyq qýǵan. Qymbat kólik, kóp aqsha zańdy belden basýǵa múmkindik beretin bassyzdyqqa ákelmeýi kerek, bul buljymas qaǵıda emes pe? Alaıda aýyldyń ortasynda jaýǵan oqtap qorqyp qashqan qarapaıym halyqty da, tártip saqshylaryn da kózge ilmegen oısyz toıshyldar quddy bir 90-shy jyldarda júrgendeı qarýdy qalaǵanynsha qoldanǵan. Onysyn abyroı kórip vıdeo-fotosyn áleýmettik jelige júktegen. Bul degenińiz Táýelsiz eldiń Zańyn elemeýdiń, jazasyz qalatyndaryna senimdi bolýdyń kópe-kórneý kórinis emes pe?” dedi Nartaı Aralbaıuly.
Sondaı-aq ol, jaqyn kúnderi mektep túlekteriniń bitirý keshteri bolatynyn, atalmysh keshterde tártipsizdik oryn almaýyn, adam shyǵynynyń aldyn alý qajet ekenin eske saldy:
“Az kúnde orta mektep túlekteri, túrli oqý oryndarynyń bitirýshileri attestat, dıplom alý keshterin jappaı atap ótedi. Sol kezde de otshashý jasap, avtokólikpen jarysyp jastarymyz apatqa ushyrap jazym bolmaýy úshin barlyq jaǵdaıdy jasaý kerek. Túlektermen, ata-analarmen túsindirý jumystaryn júrgizgen jón” dep qosty ol.
Ishki ister mınıstri Erjan Saparbekulyna qoǵamdyq tártipti saqtaý sharalaryn kúsheıtip, túlekterdiń keshterinde zańsyzdyq oryn almaýy úshin reıdter júrgizý qajettigin atady ol. Onymen qosa:
“Prokýratýra, Sot-tergeý organdary Almaty oblysy Eńbekshi qazaq aýdanynyń Túrgen aýylynda bolǵan oqıǵany saralap, oǵan qatysy bar azamattarǵa zańǵa saı qatań jaza kesýi kerek. Ishki ister mınıstrligi qarapaıym azamattardyń qolyndaǵy qarý-jaraqqa ınventarızaııa júrgizip, olardyń zańǵa sáıkes kelmeıtinderin tárkileý qajet. Jáne osy salany retteıtin normatıvtik-quqyqtyq aktilerdi qatańdatý kerek” dep atap ótti Nartaı Sársenǵalıev.
