Densaýlyq saqtaý mınıstri Qazaqstanda jańa ýaqyttyń halyqqa áseri týraly aıtty, dep habarlaıdy “Adyrna” ulttyq portaly kursiv.media-ǵa siltep.
Mınıstr Aqmaral Álnazarova úsh aı buryn aýysqan biryńǵaı ýaqyt beldeýiniń qazaqstandyqtardyń densaýlyǵyna áseri týraly suraqqa jaýap berdi.
«Siz «Jańa ýaqyt beldeýi halyqtyń densaýlyǵyna oń áser etedi dep esepteımin» degen bolatynsyz. Biraq burynǵy ýaqyt beldeýin qaıtarý úshin petıııaǵa qol qoıyp jatqan azamattar bar. Mysaly, Shyǵys Qazaqstan oblysyndaǵy turǵyndardy aıtýǵa bolady. Onda ýaqyt beldeýiniń ózgerýine baılanysty turǵyndarǵa psıhologııalyq, fızıkalyq júkteme túsken. «Erterek turatyn boldyq, uıqymyz qanbaıdy, jumysymyz ónbeıdi» dep turǵyndar shaǵymdanyp jatyr. Sizdiń qazirgi oıyńyz qandaı?», - dep BAQ ókili Úkimette ótken baspasóz máslıhatynda mınıstrge saýal joldaǵan.
Densaýlyq mınıstri Álnazarova biryńǵaı ýaqyt beldeýine kóshý ǵylymı derekterden keıingi sheshim bolǵanyn aıtady. Mınıstr jańa ýaqyttyń turǵyndar densaýlyǵyna eshqandaı keri áseri bolmaǵan dep esepteıtinin de atap ótti.
«Negizi saǵat beldeýi máselesi birneshe jyldan beri talqylandy. Bul jumysqa elimizdegi ǵylymı ortalyqtar tartyldy. Mysaly, fızıologııa ınstıtýty, Fesenkov atyndaǵy astrofızıka ınstıtýty. Sondyqtan bul sheshim ǵylymı derekterge súıene otyryp qabyldandy. Ekinshiden, saǵat beldeýi ózgergennen keıin emhanalar men aýrýhanalarǵa naýqastardyń aıtarlyqtaı túsip jatqanyn baıqap otyrǵan joqpyz. Búgingi tańda densaýlyqqa keri áser etken joq dep aıtýǵa negiz bar», - dep jaýap berdi mınıstr.
Eske sala keteıik, 7 maýsym kúni jańa ýaqyt beldeýine baılanysty petıııaǵa 50 000 adam qol qoıǵany týraly jazǵan edik.
