Ózbekstan musylmandary dinı basqarmasy ımamdardyń áleýmettik jelide sóıleýine shekteý qoıdy, dep habarlaıdy “Adyrna” ulttyq portaly.
27 mamyrda Ózbekstandaǵy barlyq meshit ımamdaryna áleýmettik jelilerge kirmeý jáne áleýmettik jelidegi jazbalarǵa «laık» baspaý týraly eskertý berildi.
Tashkent qalasynyń bas ımamynyń kómekshisi Ergash Rýstamovtyń Telegram arqyly aýdandardyń bas ımamdaryna joldaǵan aýdıo habarlamasynda áleýmettik jelidegi sózderdi qatań baqylaý týraly aıtylǵan.
«Sálemetsizder me, qurmetti oblystyń bas ımamdary. Endigi mindetimiz – áleýmettik jelige kirmeý. Biz muny qatań baqylaýǵa alamyz. Bul qajylyq paryzyn óteıtinderge de qatysty. Áleýmettik jelidegi kez kelgen taqyrypqa keri baılanys berýge bolmaıdy», - dedi Rýstamov.
Imamdar dinı basqarmanyń bul sheshimin olardyń qyzmetine memlekettik baqylaýdy kúsheıtý dep túsindi.
Qaýipsizdik maqsatynda aty-jónin atamaýdy qalaǵan Tashkent ımamy ımamdardyń ınternetke shyǵýyna shekteý qoıý ar-ojdan bostandyǵy týraly zańǵa qaıshy keledi deıdi.
«Bul múftıdiń buıryǵy deıdi. Biraq bul bizdiń qol-aıaǵymyzdy baılap qoıady», – deıdi tashkenttik ımam.
Sońǵy ýaqytta birqatar ımamdar dinı basqarmanyń paıymdaýynsha, rýhanı deńgeıine saı kelmegendikten qyzmetterinen shettetildi.
Buǵan deıin habarlaǵanymyzdaı, Ózbekstanda meshit ımamdary men naıb ımamdarynan sheteldik tólqujattaryn eldegi musylmandar dinı basqarmasynyń jergilikti ókilderine tapsyrý suralǵan. Sebebi, ımamdardyń shetelge shyǵýyna jol bermeý kózdelgen.
«Sońǵy kúnderi ımamdar qatty qysymǵa ushyrady, sondyqtan bılik keıbir ımamdar elden ketip qalady dep qorqady», - dedi «Azattyq» (Ozodlık) radıosynyń ózbek qyzmetiniń suhbattastarynyń biri.
Ózbekstan mınıstrler kabıneti janyndaǵy Din isteri jónindegi komıtettiń málimeti boıynsha, 2021 jyldyń 1 tamyzyndaǵy jaǵdaı boıynsha elde 16 konfessııanyń 2285 dinı uıymy jumys isteıdi. Onyń 2098-i ıslamdyq uıym bolsa, 188-i basqa dinı aǵymdarǵa jatady.
Ózbekstan Konstıtýııasyna sáıkes din memleketten bólingen. Dinı uıymdar men konfessııalardyń qyzmeti Ózbekstan Respýblıkasynyń «Ar-ojdan bostandyǵy jáne dinı uıymdar týraly» Zańymen retteledi.
