Mańǵystaý oblysynyń eks-ákimi Nurlan Noǵaev Telegram jelisi arqyly mańǵystaýlyqtarmen qoshtasty, dep habarlaıdy «Adyrna» tilshisi.
«Qurmetti mańǵystaýlyqtar, qadirli jerlester! Ózderińizben birge óńirimizdiń damýy men ıgiligi úshin jumys isteý men úshin úlken mártebe boldy.
Úsh jylǵa jýyq ýaqyt buryn Memleket basshysy Qasym-Jomart Kemeluly Toqaev maǵan Mańǵystaý oblysyn basqarýdy tapsyrdy, osy úlken senimi úshin Prezıdentimizge rahmet aıtamyn. Mańǵystaýdaǵy qyzmetim barysynda árdaıym Prezıdentimizdiń qoldaýyna ıe bolyp, bilimimdi, kásibı, ómirlik tájirıbelerimdi, biliktiligimdi óńirdiń damýyna jumsadym.
Meniń barlyq jumysym sizderdiń kóz aldaryńyzda boldy, ózderińizben túrli máselemen jıi júzdestik, kelisip otyryp qajet sheshimderdi qabyldadyq. Atap aıtqanda, óndiris oryndaryn, sharýashylyqtardy, turǵyndardy sapaly sýmen qamtamasyz etý, MAEK-tiń úzdiksiz jumysyn qamtamasyz etý, ınjenerlik jelilerdi jańartý, negizsiz bólingen jer telimderin qaıtarý jáne zańsyz qurylystarmen kúresý baǵytynda, taǵy basqa aýqymdy jumystar atqaryldy.
Osy úsh jyl ishindegi oblys ıgiligi úshin birlesken nátıjeli eńbekterińiz úshin shyn júrekten alǵys aıtamyn»,—dedi ol.
Nurlan Noǵaev Mańǵystaýdyń damý áleýeti zor óńir ekenin atap ótti.
«Ashyq aspan astyndaǵy murajaı atanǵan osynaý kıeli ólkede ótken kezeń meniń júregimde jyly estelik bolyp máńgi saqtalady. Mańǵystaý - ekonomıkasy nyq, damý áleýeti zor óńir. Eń bastysy óz elin súıetin, onyń gúldenýi úshin baryn salatyn rýhy bıik halqy bar.
Sizderge barlyq jaqsylyqty tileı otyryp, tabys pen jańa jetistikterge jete berýlerińizge shyn júrekten tilektespin!»—dep túıindedi eks-ákim.
Eske salaıyq, 16 mamyr kúni Nurlan Asqaruly qyzmetinen bosatylǵan edi. Ol ákim bolǵan 2 jyl 8 aıda Qańtar oqıǵasy, eńbek janjaldary men MÓEK-tegi jazataıym oqıǵalar boldy.
