ماڭعىستاۋ وبلىسىنىڭ ەكس-اكىمى نۇرلان نوعاەۆ Telegram جەلىسى ارقىلى ماڭعىستاۋلىقتارمەن قوشتاستى، دەپ حابارلايدى «ادىرنا» ءتىلشىسى.
«قۇرمەتتى ماڭعىستاۋلىقتار، قادىرلى جەرلەستەر! وزدەرىڭىزبەن بىرگە ءوڭىرىمىزدىڭ دامۋى مەن يگىلىگى ءۇشىن جۇمىس ىستەۋ مەن ءۇشىن ۇلكەن مارتەبە بولدى.
ءۇش جىلعا جۋىق ۋاقىت بۇرىن مەملەكەت باسشىسى قاسىم-جومارت كەمەلۇلى توقاەۆ ماعان ماڭعىستاۋ وبلىسىن باسقارۋدى تاپسىردى، وسى ۇلكەن سەنىمى ءۇشىن پرەزيدەنتىمىزگە راحمەت ايتامىن. ماڭعىستاۋداعى قىزمەتىم بارىسىندا ءاردايىم پرەزيدەنتىمىزدىڭ قولداۋىنا يە بولىپ، ءبىلىمىمدى، كاسىبي، ومىرلىك تاجىريبەلەرىمدى، بىلىكتىلىگىمدى ءوڭىردىڭ دامۋىنا جۇمسادىم.
مەنىڭ بارلىق جۇمىسىم سىزدەردىڭ كوز الدارىڭىزدا بولدى، وزدەرىڭىزبەن ءتۇرلى ماسەلەمەن ءجيى جۇزدەستىك، كەلىسىپ وتىرىپ قاجەت شەشىمدەردى قابىلدادىق. اتاپ ايتقاندا، ءوندىرىس ورىندارىن، شارۋاشىلىقتاردى، تۇرعىنداردى ساپالى سۋمەن قامتاماسىز ەتۋ، ماەك-ءتىڭ ۇزدىكسىز جۇمىسىن قامتاماسىز ەتۋ، ينجەنەرلىك جەلىلەردى جاڭارتۋ، نەگىزسىز بولىنگەن جەر تەلىمدەرىن قايتارۋ جانە زاڭسىز قۇرىلىستارمەن كۇرەسۋ باعىتىندا، تاعى باسقا اۋقىمدى جۇمىستار اتقارىلدى.
وسى ءۇش جىل ىشىندەگى وبلىس يگىلىگى ءۇشىن بىرلەسكەن ناتيجەلى ەڭبەكتەرىڭىز ءۇشىن شىن جۇرەكتەن العىس ايتامىن»،—دەدى ول.
نۇرلان نوعاەۆ ماڭعىستاۋدىڭ دامۋ الەۋەتى زور ءوڭىر ەكەنىن اتاپ ءوتتى.
«اشىق اسپان استىنداعى مۇراجاي اتانعان وسىناۋ كيەلى ولكەدە وتكەن كەزەڭ مەنىڭ جۇرەگىمدە جىلى ەستەلىك بولىپ ماڭگى ساقتالادى. ماڭعىستاۋ - ەكونوميكاسى نىق، دامۋ الەۋەتى زور ءوڭىر. ەڭ باستىسى ءوز ەلىن سۇيەتىن، ونىڭ گۇلدەنۋى ءۇشىن بارىن سالاتىن رۋحى بيىك حالقى بار.
سىزدەرگە بارلىق جاقسىلىقتى تىلەي وتىرىپ، تابىس پەن جاڭا جەتىستىكتەرگە جەتە بەرۋلەرىڭىزگە شىن جۇرەكتەن تىلەكتەسپىن!»—دەپ تۇيىندەدى ەكس-اكىم.
ەسكە سالايىق، 16 مامىر كۇنى نۇرلان اسقارۇلى قىزمەتىنەن بوساتىلعان ەدى. ول اكىم بولعان 2 جىل 8 ايدا قاڭتار وقيعاسى، ەڭبەك جانجالدارى مەن موەك-تەگى جازاتايىم وقيعالار بولدى.
