Premer-mınıstr órtten qorǵaý jumystaryn synady, dep habarlaıdy "Adyrna" ulttyq portaly QazAqparatqa siltep.
Elimizde ótken jyly 116 myń gektardan astam orman qory órtenip ketti. QR Premer-Mınıstri Oljas Bektenov bıyl da aptap ystyq pen qurǵaqshylyq boljanyp otyrǵanyn aıtty.
«Jyl saıyn elimizde myńǵa jýyq tabıǵı órt bolady. Tilsiz jaý adam ómirine, sol sııaqty qorshaǵan ortaǵa da orasan qaýip tóndiredi. Ótken jyly 116 myń gektardan astam orman qory órtenip ketti. Elimizdegi orman alqaptary onsyz da óte az, olardyń aýmaǵy órt saldarynan jyl saıyn sırep barady», - dedi O.Bektenov Úkimet otyrysynda.
Premerdiń sózinshe tilsiz jaýdan kelgen materıaldyq shyǵyn 160 mlrd teńgeden asyp túsken.
«Qazgıdromettiń boljamyna sáıkes, bıyl jaz aılary ystyq ári qurǵaqshylyq bolady dep kútilýde. Ásirese, elimizdiń batysy men shyǵysynda jáne ońtústiginde aptap ystyq uzaq saqtalýy múmkin. Demek, órt qaýpi kúsheıe túsedi. Bıyldyń ózinde 30-ǵa jýyq orman órti tirkeldi. Máselen, ótken jyly órtten qatty zardap shekken «Semeı ormany» aýmaǵy bıyl taǵy da otqa orandy. Abaı oblysynyń ákimdigi baqylaýdy kúsheıtýi kerek», - dedi Úkimet basshysy.
Birneshe oblystarda qyzyl jalynnyń paıda bolý sebebi qýraǵan shóp pen qoqystar. Oljas Bektenov Aqtóbe, Atyraý, Qaraǵandy, Jambyl jáne Qyzylorda oblystarynda qamys pen qýraǵan shóp janyp, órtke ulasqanyn da basa aıtty.
«Qazir múddeli memlekettik organdar Tabıǵı órtterdiń aldyn alý jáne olardy joıý jónindegi is-sharalar josparyn iske asyryp jatyr. Alaıda keıbir salalarda bul jumystar tıisti deńgeıde júrgizilmeı otyr. Aqmola, Almaty, Shyǵys Qazaqstan, Jambyl, Abaı jáne Ulytaý oblystarynda mıneraldanǵan jolaqtardy jasaý endi ǵana bastalǵan, qajetti kólemniń úshten birine áreń jetedi. Aqtóbe, Pavlodar, Qaraǵandy, Soltústik Qazaqstan oblystarynyń aýyldaryndaǵy aýmaqtar áli kúnge deıin qýraǵan shóp pen qoqystardan tazartylmaǵan», - deıdi Premer-Mınıstr.
