Almaty ákimdigi qala turǵyndary men qonaqtaryn gúlzarlarǵa kirmeýge jáne ósimdikterdi zaqymdamaýǵa shaqyrdy, dep habarlaıdy "Adyrna" ulttyq portaly.
Jelide gúldermen túsken ádemi fotolardan bólek turǵyndardyń sátti selfı jasaý úshin gúlderdi qalaı talap, taptaıtyny kórsetilgen beıneler taraǵan. Sol sebepti ákimdik gúlzardaǵy sýret úshin aıyppul salmaq.
Almaty ekologııa jáne qorshaǵan ortany qorǵaý basqarmasynyń málimetinshe, Esentaı ózeniniń boıynda jaıqalyp ósip turǵan qyzǵaldaqtar kúzde egilgen. Aýa raıy qolaıly bolǵan kezde gúlder sáýirdiń ortasynan mamyrǵa deıin gúldeıdi eken.
“Áleýmettik jelilerde tirkelgen faktilerge baılanysty departament Almaty turǵyndary men qonaqtaryn sándik gúldi kógaldandyrýǵa jáne qoǵamdyq oryndarǵa qamqorlyq jasaýǵa shaqyrady”, – dep habarlady Almaty ákimdigi.
Qoldanystaǵy zańnamaǵa sáıkes abattandyrý erejelerin buzǵany úshin ákimshilik jaýapkershilik qarastyrylǵanyn eske salady. Demek, jeke tulǵalarǵa eskertý nemese 20 AEK (teńgemen eseptegende 73 840 teńge), shaǵyn kásipkerlik sýbektilerine 30 AEK (110 760 teńge), orta kásipkerlik sýbektileri úshin 40 AEK (147 680 teńge), iri kásiporyndar úshin 100 AEK (369 200 teńge) aıyppul salynatyny belgili boldy.
Aıta keteıik, ótken aıda Túrkistan oblysyndaǵy Ordabasy aýdanynda stýdent qyzdyń Greıg qyzǵaldaqtaryn julyp, sýretke túskeni úshin mıllıon teńgeden astam aıyppul arqalaýy múmkin ekenin jazǵan bolatynbyz.
