Inderbor kentine baratyn joldy sý basý qaýpi tónip tur, dep habarlaıdy "Adyrna" ulttyq portaly Qazaqparatqa siltep.
Atyraý-Oral trassasynan Inder aýdanyna baratyn 7 shaqyrymdyq joldy sý basý qaýpi tóngendikten júk kólikteriniń qozǵalysyna shekteý qoıyldy.
Qaýiptiń kúsheıý sebebi Jaıyq ózenindegi sý deńgeıi kóterilýi men ekpindi jel.
12 mamyr kúni kúndizgi 16:00-de Jaıyq ózeniniń sý deńgeıi 1 035 santımetrge jetken. Jergilikti jedel shtab bul qaýipti deńgeıden +190 santımetrge kóp ekenin habarlaıdy.
Odan bólek, jeldiń saldarynan Inderbor kentine baratyn jolǵa tirelgen sýdyń tolqynyn kúsheıtken.
«Joldyń eki jaǵyna topyraq tógilip, bóget soǵylǵan edi. Biraq, sý asfalttyń astynan ótip, endi betine shyǵyp jatyr. Osyǵan baılanysty Atyraý-Oral trassasynan Inderbor kentine deıin baratyn 7 shaqyrymdyq jolda júk kólikteriniń qozǵalysy toqtatyldy. Qazir jaǵdaı baqylaýǵa alynyp, tıisti jumystardy atqarý áli de jalǵasýda», - dep habarlady aýdandyq jedel shtabtan.
