Qazaqstannyń BAÁ-degi elshiliginiń keńesshisi Sáken Mamashtyń áıeli kúıeýiniń kóp jylǵy azaptaý áreketteri jaıly aıtty, - dep habarlaıdy “Adyrna” ulttyq portaly. Bul týraly ol KTK arnasyna bergen suhbatynda málimdedi.
Karına Mamash 6 mamyrda áleýmettik jelide kúıeýiniń 10 jyl boıy soqqyǵa jyqqanyn habarlaǵan bolatyn. Qazir jas kelinshek balalarymen, ápkesi men anasymen Astanadaǵy daǵdarys ortalyǵynda jatyr.
"Qazir men ózimdi qaýipsiz sezinemin. Balalar janymda, anam, ápkem de. Men uzaq jyldar boıy qorqynyshpen ómir súrgendikten qazir ózime keldim. Men eshqaıda barmadym. Al onyń keıbir týystary, dálirek aıtsaq jıeni bildi. Sebebi ol meni kezekti uryp-soǵýdan keıin aýrýhanaǵa murnymdy tigý úshin aparǵan bolatyn. Men ketemin dep aıtqan joqpyn, men jelige barlyq aıypty dáleldeıtinimdi aıttym. Meni urýyńdy toqtatpasań, túrmege jabylasyń dedim. Al ol maǵan «Maǵan báribir» dep kúldi”, - dedi Karına Mamash.
Dıplomattyń áıeliniń aıtýynsha, bir kún buryn kúıeýi ózin ǵana emes, olarǵa qonaqqa kelgen ápkesin de urǵan. Ápkesiniń basy qatty soqqydan keıin kógerip, kórý qabileti nasharlaǵan.
Karına otbasyndaǵy zorlyq-zombylyq týraly tek jaqyn dostary ǵana biletinin jáne ol kóp jaǵdaıdy otbasynan jasyratynyn aıtady. Bul rette ol bári úılengen alǵashqy kúnnen bastalǵanyn aıtady. Kóbine kúıeýi agressıvti bolyp, mas bolǵan kezde qolyn kóteretin bolǵan.
Qazaqstannyń Syrtqy ister mınıstrligi Sáken Mamashty shetelden shuǵyl túrde shaqyrtyp aldy. Astana polıııasy qylmystyq is qozǵady.
«Bul kóbine aıtyla bermeıtin máseleniń shetin ashady. Shetelde turatyn dıplomattardyń áıelderi kóp jaǵdaıda qarjylaı kúıeýine táýeldi bolady. Óıtkeni dıplomattarǵa shetelge issaparǵa, áıelderi men balalaryn ornalastyrý úshin tólenetin «qosymsha» qarajat degen bar. Áıelderdiń jeke qarajaty kóp bolmaıdy, sondyqtan olar ózderiniń jubaılaryna belgili bir dárejede táýeldi bolady. Sondyqtan mundaı zorlyq-zombylyq áreketteri kóbine aıtylmaı qalady», - dedi «Qorǵaý Astana» qorynyń basshysy.
