Qyrǵyzstan prezıdenti Sadyr Japarov Jalal-Abad oblysynyń Sozaq aýdanynda bolǵan júk kóligi men oqýshylar arasyndaǵy apatqa qatysty mán-jaıdy zertteý úshin arnaıy komıssııa qurýdy tapsyrdy, dep habarlaıdy "Adyrna" ulttyq portaly Qyrǵyzstan memleketi basshysynyń baspasóz qyzmetine siltep.
«Qyrǵyz Respýblıkasynyń Prezıdenti Sadyr Japarov 2 mamyrda Jalal-Abad oblysy Sozaq aýdany Jerge-Tal aýylynda «Porter» júk kóligimen bolǵan oqıǵaǵa qatysty barlyq mán-jaıdy anyqtaý úshin komıssııa qurýdy tapsyrdy. Komıssııa quramyna tıisti mınıstrlikter men prezıdent ákimshiliginiń ókilderi kirdi», - delingen habarlamada.
Komıssııa jumysynyń qorytyndysy boıynsha «tıisti sheshimder» qabyldanady, dep atap ótti baspasóz qyzmeti. «Memleket basshysynyń atynan zardap shekkenderge qarjylaı kómek kórsetildi, balalardyń densaýlyǵynyń jaı-kúıi týraly Prezıdent Sadyr Japarovqa udaıy málimet berilip otyrady», - dep jazdy.
Esterińizge sala keteıik, 2 mamyr kúni Qyrǵyzstannyń Sozaq aýdanynda "balmuzdaq tıelgen fýrgon" dep habarlanǵan júk kóligi ashyq aspan astynda «Manas» eposyn oryndaǵan 29 oqýshyny qaǵyp ketkenin habarlaǵan bolatynbyz. Oqıǵadan keıin eldiń Bilim mınıstrligi mundaı sharalardy ótkizýge tyıym saldy. Tótenshe jaǵdaıdan keıin medıınalyq kómekke 35 bala men jasóspirim júginip, onyń 20-sy aýrýhanaǵa jatqyzyldy. Beseýi jansaqtaý bóliminde ekeni aıtyldy.
