Qazaqstandyq mänerlep syrǧanauşy, qysqy olimpiada chempiony Mihail Şaidorov bırneşe ai boiy jalaqy almaǧanyn aityp, sondai-aq sporttyq ataq beru men memlekettık qoldau şaralaryna qatysty sūraqtardy kötergen. Osyǧan bailanysty jaǧdaiǧa tüsınıkteme beru üşın Turizm jäne sport ministrı Erbol Myrzabosynov pıkır bıldırdı. Būl turaly Zakon.kz jazdy, dep habarlaidy “Adyrna”.
Vedomstvonyŋ mälımetınşe, Mihail Şaidorov būrynǧy olimpiadalyq sikl boiynşa kelısımşart negızınde jalaqy alǧan, al būl qūjat 2026 jyldyŋ aqpanynda aiaqtalǧan. Nauryz aiynan bastap jaŋa olimpiadalyq siklge arnalǧan jaŋa kelısımşart jasaluy tiıs bolǧan. Alaida ol älı künge deiın qol qoiylmaǧandyqtan, jaŋa kezeŋ boiynşa tölemderge qūqyqtyq negız joq.
Ministrlık jaŋa kelısımşart sportşynyŋ olimpiadalyq chempiony retındegı statusyn eskere otyryp, tiımdırek şarttarmen ūsynylǧanyn atap öttı. Degenmen taraptar «mındettemeler» tarmaǧy boiynşa ortaq kelısımge kele almai otyrǧany aityldy.
Vedomstvonyŋ tüsındıruınşe, ūlttyq qūrama sportşylarymen jasalatyn kelısımşarttar ülgılık sipatta bolady jäne barlyq sportşylarǧa bırdei qoldanylady. Būl qūjat oqu-jattyǧu jiyndaryn, jarystarǧa qatysudy, medisinalyq süiemeldeudı jäne jalaqy töleu tärtıbın retteidı.
Ministrlık ökılderı kelısımşartqa qol qoiylǧannan keiın barlyq qarjylyq mäseleler retteletının jäne sportşyǧa tiesılı tölemder tolyq kölemde tölenetının mälımdedı.
Sondai-aq vedomstvo ökılderı Şaidorovtyŋ «qysym jasalyp jatyr» degen pıkırın joqqa şyǧaryp, mūndai jaǧdaidyŋ joq ekenın atap öttı. Olardyŋ aituynşa, barlyq mäsele tek ūiymdastyruşylyq jäne qūqyqtyq sipatqa ie.
“Mihail Şaidorovqa Olimpiada altyny üşın qarastyrylǧan syiaqyny töleu mausym–şılde ailaryna josparlanǧan. Al sporttyq ataq beru turaly būiryqqa qol qoiylǧan jäne ol jaqyn uaqytta resmi türde tabystalmaq”, – dedı ministr.
Ministrlık barlyq mäseleler zaŋ aiasynda jäne özara tüsınıstık negızınde şeşıletının, al memleket sportşylar aldyndaǧy mındettemelerın tolyq oryndaitynyn jetkızdı.
Mihail Şaidorov mäselesınen keiın Prokzsport redaksiiasy Qazaqstannyŋ olimpiada chempiondarymen bailanysqa şyqty.
Sportşylardyŋ aituynşa, qoǧamda memlekettık qoldau türlerı jiı şatastyrylyp jür. 250 myŋ dollar kölemındegı syiaqy, päter jäne ömır boiǧy tölemder - Olimpiadada jeŋıske jetken sportşylarǧa berıletın zaŋmen bekıtılgen marapattar. Būl tölemder sportşynyŋ keiıngı jyldardaǧy jalaqysyna nemese jaŋa olimpiadalyq sikldegı qarjylandyruǧa äser etpeidı.
Sonymen qatar, ärbır olimpiadalyq sikl aiaqtalǧannan keiın sportşylarmen jaŋa kelısımşart jasalady. Būl qūjat oqu-jattyǧu jiyndaryn, halyqaralyq jarystarǧa qatysudy jäne jalpy daiyndyq prosesın qarjylandyru tärtıbın retteidı.
Mamandardyŋ pıkırınşe, kelısımşartsyz sportşyǧa jalaqy taǧaiyndau jäne tolyqqandy daiyndyqty qamtamasyz etu mümkın emes. Būl käsıbi sporttaǧy qalypty täjıribe retınde qarastyrylady.
Chempiondar Mihail Şaidorovtyŋ qazırgı taŋda Qazaqstan sportynyŋ jetekşı ökılderınıŋ bırı ekenın atap öttı. Olardyŋ aituynşa, maŋyzdysy — jaǧdaidy uşyqtyrmai, barlyq qūqyqtyq räsımderdı uaqtyly aiaqtau.
