İtaliianyŋ Verona qalasynda Milan-Kortina-2026 qysqy Olimpiada oiyndarynyŋ jabylu saltanaty öttı. Būl turaly ŪOK jazdy, dep habarlaidy «Adyrna» tılşısı.
Saltanatty keş Europadaǧy eŋ tanymal tarihi nysandardyŋ bırı - ekı myŋ jyldan astam tarihy bar ärı IýNESKO-nyŋ Bükılälemdık mūralar tızımıne engen Arena di Verona amfiteatrynda ūiymdastyryldy. Qysqy Olimpiada tarihynda alǧaş ret jabylu saltanaty osyndai köne amfiteatrda ötıp, tarihi oryn zamanaui sahna keipıne endı.
Räsım barysynda jarystar aiaqtalǧannan keiıngı bırlıktı bıldıretın sportşylar şeruı öttı. Atletter amfiteatrǧa saltanatty türde kırdı.
Barlyq qūramanyŋ tu ūstauşylary delegasiialardan bölek jürıp öttı. Qazaqstannyŋ Memlekettık tuyn İtaliiada altyn medal jeŋıp alǧan mänerlep syrǧanauşy Mihail Şaidorov alyp şyqty.
İtaliiadaǧy Olimpiadada Qazaqstan qūramasynyŋ atynan 36 sportşy 10 sport türınde synǧa tüstı. Medaldyq esepte elımız bır altyn jüldemen 19-orynǧa tūraqtady.
Qazaqstan qūramasynyŋ bırneşe ökılı öz jarystarynda alǧaşqy ondyqqa kırdı. İlia Mizernyh täuelsız Qazaqstan tarihyndaǧy eŋ üzdık nätijenı tırkedı. Şaŋǧymen ülken tūǧyrdan sekırude ol segızınşı oryn alyp, osy sport türındegı ūlttyq rekordty jaŋartty. Konkimen jügıruşı Nadejda Morozova 3000 metr qaşyqtyqta altynşy bolyp märege jettı. Būl - 1998 jyly Liudmila Prokaşeva Olimpiadada qola medal alǧannan bergı eŋ joǧary nätije. Sonymen qatar Morozova 5000 metrde toǧyzynşy, komandalyq ız kesu saiysynda segızınşı oryn ielendı. Onyŋ komandalasy Elizaveta Golubeva da üş ret üzdık ondyqqa endı. Ol 1500 metrde - jetınşı, 3000 metrde - onynşy oryn aldy. Golubeva jäne Morozovamen bırge komandalyq ız kesu saiysynda Arina İliaşenko da segızınşı nätije körsettı. Qazaqstandyq konkimen jügıruşı Evgenii Koşkin 500 metr qaşyqtyqta toǧyzynşy orynǧa tūraqtady. Şort-trekşı Denis Nikişa 500 metr qaşyqtyqta jetınşı oryn alyp, jekelei saiystaǧy özınıŋ eŋ joǧary nätijesıne qol jetkızdı. Fristail-akrobatikadan aralas komandalyq bäsekede Qazaqstan qūramasy jetınşı boldy. Būl synda Asylhan Asan, Roman İvanov jäne Aiana Joldas öner körsettı. Aita keteiık, erler arasynda Roman İvanov 13-oryn alyp, ūlttyq qūrama tarihyndaǧy üzdık nätijenı jaŋartty. Mogulşy Anastasiia Gorodko da üzdık ondyqqa endı. Ol paralleldı mogulda şirek finalǧa deiın jetıp, segızınşı oryn aldy. Osy dissiplinada Pavel Kolmakov toǧyzynşy satyǧa jaiǧasty. Mänerlep syrǧanaudan äielder arasynda Sofia Samodelkina Qazaqstan tarihynda eŋ joǧary nätijenı tırkedı. Qysqa jäne erkın baǧdarlamanyŋ qorytyndysy boiynşa ol onynşy orynǧa tūraqtady.
Dästür boiynşa saltanatty räsımnıŋ negızgı bölıgı aiaqtalǧan soŋ Olimpiada tuy tüsırılıp, kelesı qysqy Olimpiadany qabyldaityn el – Fransiia ökılderıne tabystaldy. 2030 jylǧy Qysqy Olimpiada oiyndary osy memlekette ötedı. Sondai-aq ūiymdastyruşy el aldaǧy dodanyŋ «Taŋ şuaǧy» atty tanystyrylymyn ūsyndy. Odan keiın italiialyq sazger Liudoviko Einaudidıŋ äuenımen Milan men Kortinada janǧan 2026 jylǧy Olimpiada alauy söndırıldı.
