AQŞ armiiasynyŋ äskeri qolbasşylyǧy el prezidentı Donald Trampqa İran aumaǧynan şamamen 450 kg joǧary baiytylǧan urandy basyp alyp, elden şyǧaru jönındegı jospardy ūsyndy. Būl turaly 1 säuırde The Washington Post jazdy, dep habarlaidy «Adyrna» tılşısı.
Mälımetke säikes, jospar aiasynda İranǧa äue arqyly jer qazu tehnikasyn jetkızu jäne jük ūşaqtaryna arnalǧan ūşu-qonu jolaǧyn salu qarastyrylǧan. Osy ūşaqtarmen radioaktivtı material İslam Respublikasynyŋ aumaǧynan syrtqa şyǧaryluy tiıs.
Basylymnyŋ jazuynşa, būl jospar Tramptyŋ sūranysynan keiın ötken aptada ūsynylǧan. Būǧan deiın mūndai jospardy AQŞ äkımşılıgı qarastyryp jatqany turaly The Wall Street Journal da habarlaǧan edı.
İrandaǧy urandy basyp aluǧa baǧyttalǧan yqtimal operasiia joǧary täuekeldı arnaiy operasiia retınde baǧalanyp otyr. The Washington Post keltırgen sarapşylardyŋ pıkırınşe, mūndai kürdelı tapsyrma būryn-soŋdy soǧys jaǧdaiynda qoiylmaǧan. Būl missiiany oryndau üşın jüzdegen nemese myŋdaǧan äskeri qyzmetkerdı jäne auyr tehnikany äue arqyly jetkızu qajet boluy mümkın. Olar radioaktivtı materialdardy qazyp alyp, şyǧaru jūmystaryn qamtamasyz etedı.
Jurnalister tıldesken AQŞ Qorǧanys ministrlıgınıŋ būrynǧy qyzmetkerlerınıŋ aituynşa, mūndai jūmystar bırneşe aptaǧa sozylyp, İran aumaǧynyŋ tereŋınde, atys jaǧdaiynda jürgızıluı yqtimal.
AQŞ äkımşılıgı İranǧa ūsynǧan soǧysty toqtatu jönındegı 15 tarmaqtan tūratyn jospardyŋ ışınde Tegeranǧa joǧary baiytylǧan urannan bas tartu talaby da bar. İran būl talapty qabyldamaǧanymen, soǧys bastalmai tūryp-aq urandy baiytu deŋgeiın tömendetuge daiyn ekenın jetkızgen.
AQŞ äskerı İran uranyn basyp alu josparyna qatysty Aq üidıŋ baspasöz hatşysy Kerolain Livitt tüsınıkteme berdı.
«Pentagonnyŋ mındetı — bas qolbasşyǧa mümkın bolatyn barlyq nūsqany ūsynu üşın daiyndyq jürgızu. Būl prezident naqty şeşım qabyldady degendı bıldırmeidı», — dep atap öttı ol.
Aq üi basşysy Donald Tramp pen AQŞ Qorǧanys ministrlıgınıŋ basşysy Pit Hegset bırneşe ret AQŞ pen İzraildıŋ İranǧa qarsy soǧystaǧy maqsaty — İslam Respublikasynyŋ iadrolyq qaru jasauyna jol bermeu ekenın mälımdegen. MAGATE derekterıne säikes, İranda şamamen 60%-ǧa deiın baiytylǧan 440 kg-ǧa juyq uran bar. Būl — iadrolyq qaru jasauǧa qajettı baiytu deŋgeiıne öte jaqyn körsetkış.
