Aqtau qalasynda Asiakoz klinikasynyŋ bazasynda köru müşelerı aurularyn diagnostikalau jäne emdeudıŋ zamanaui täsılderıne arnalǧan maŋǧystaulyq oftalmologtardyŋ käsıbi kezdesuı öttı. Is-şaranyŋ negızgı maqsaty — täjıribe almasu jäne öŋırdegı oftalmologiialyq kömektıŋ sapasyn arttyru.
Kezdesu barysynda Asiakoz International Hospital klinikasynyŋ türkiialyq mamany, oftalmohirurg Erol Djoşkun öz käsıbi täjıribesımen bölıstı. Mamanynyŋ aituynşa, ol tört aidan astam uaqyt boiy Aqtau qalasynda jūmys ıstep, Asiakoz klinikasynda nauqastarǧa keŋes berıp, hirurgiialyq operasiialar jürgızıp keledı.
Öz sözınde Erol Djoşkun köz aurulary boiynşa mamandarǧa der kezınde jügınudıŋ maŋyzdylyǧyn atap öttı. Onyŋ aituynşa, oftalmologqa uaqytyly qaralmau köptegen jaǧdaida qaitymsyz saldarǧa, sonyŋ ışınde köru qabıletınıŋ aitarlyqtai tömendeuıne äkeluı mümkın.
Kezdesu aşyq käsıbi dialog formatynda öttı. Qatysuşylar klinikalyq jaǧdailardy, emdeudıŋ zamanaui ädısterın jäne oftalmologiia salasyndaǧy özektı mäselelerdı talqylady. Mūndai kezdesuler öŋırdegı medisinalyq kömektıŋ sapasyn arttyruǧa jäne käsıbi qauymdastyqtyŋ damuyna yqpal etedı.
Asiakoz klinikasy aldaǧy uaqytta da şeteldık mamandardyŋ qatysuymen käsıbi kezdesuler men bılım beru ıs-şaralaryn tūraqty türde ötkızudı josparlap otyr.
