Auǧanstannyŋ Tahar provinsiiasyndaǧy Chah-Ab okrugınıŋ tūrǧyndary öŋırde altyn öndıruge qarsy narazylyq bıldırıp, tälıpterge şabuyl jasady. Būl turaly Afghanistan International jazdy, dep habarlaidy «Adyrna» tılşısı,
Basylymynyŋ deregınşe, oqiǧa saldarynan kemınde üş narazylyq bıldıruşı men radikaldy qozǧalystyŋ bır ökılı qaza tauyp, şamamen 20 adam jaraqat alǧan.
Auǧanstannyŋ tau-ken önerkäsıbı jäne mūnai ministrlıgınıŋ baspasöz hatşysy Humaiun Afgan aqparatty rastady. Onyŋ aituynşa, oqiǧa adam şyǧyny men qarjylyq zalalǧa äkelgen, alaida naqty derekter jariialanbaǧan. Qazır jaǧdaidy tekseru üşın arnaiy komissiia jıberılgen, onyŋ qorytyndysy keiınırek habarlanady.
Jurnalisterdıŋ mälımetınşe, Tahar tūrǧyndary altyn öndırudı zaŋsyz dep sanaidy. Sebebı tälıpter jobalardy jüzege asyryp jatqan kompaniialar turaly tolyq aqparat bermeidı. Sonymen qatar, narazylar būl käsıporyndardyŋ qyzmetı ekologiialyq jaǧdaidy naşarlatyp, su tapşylyǧyna äkelıp otyrǧanyn aitady.
Altyn öndırılıp jatqan aumaqtardyŋ maŋynda tütın baǧandary baiqalǧan. Belsendıler kenşılerdıŋ jabdyqtaryn örtegenı habarlandy. Qauıpsızdık ahualynyŋ uşyǧuyna bailanysty altyn öndıruşı kompaniialardyŋ top-menedjerlerı provinsiiadan qaşyp ketken. BAQ deregıne süiensek, būl käsıporyndardy tälıpterdıŋ negızgı qarjylai demeuşılerınıŋ bırı sanalatyn Başar Nurzai baqylap otyr.
Kuägerlerdıŋ aituynşa, jergılıktı halyq soŋyna deiın barǧysy keledı, sondyqtan narazylar men tälıpter arasynda jaŋa qaqtyǧystar boluy mümkın.
2021 jyly radikaldy qozǧalys bilıkke kelgenge deiın jūmys ıstegen Auǧan parlamentınıŋ būrynǧy ökılı Nasim Modaber tälıpter tūsyndaǧy paidaly qazbalardy baqylausyz öndırudı ūlttyq bailyqty tonau dep baǧalady. Onyŋ aituynşa, käsıpkerlermen jasalatyn kelısımşarttar aşyq emes, al jergılıktı halyqtyŋ müddesı eskerılmeidı.
Auǧanstan ekonomikasy jönındegı sarapşy Muzammil Şinvari eldegı altyn qory 300–500 metrlık tonna aralyǧynda ekenın, onyŋ qūny ondaǧan milliard dollarmen esepteletının aitty. Altyn ken oryndary negızınen Tahar provinsiiasy men Badahşan provinsiiasynda şoǧyrlanǧan. Sarapşy tälıpterdıŋ jobalar turaly aqparatty jariialamauyn synǧa aldy. Sonyŋ saldarynan qai kompaniialar öndırıs jürgızıp jatqany, jobalardyŋ biudjetı men tabysy belgısız. Onyŋ pıkırınşe, tabiǧi resurstarǧa, sonyŋ ışınde altyn men mūnaiǧa osyndai beibereket közqaras ūzaq merzımde olardyŋ sarqyluyna alyp keluı mümkın.
