قازاق قوعامىندا جاس جەتكىنشەكتەردتىڭ ومىرلىك جولىن تاڭداۋىنا، قارا تانىعاننان رۋحاني ءنار الىپ، ۇنامدى قاسيەتتەردى ءوڭ بويىنا جيناقتاۋىنا اتا-انانىڭ تيگىزەتىن اسەرى مول. ويتكەنى بالا ومىرگە اتا-اناسىنىڭ كوزقاراسىمەن قارايدى. وسە كەلە بالانىڭ تانىم كوكجيەگى كەڭەيىپ، اينالاداعى قۇبىلىستارعا وزىندىك پىكىر قالىپتاستىرا باستايدى. بالا ارمانداۋدى ۇيرەنىپ، جەلدەن جۇيرىك، تاۋدان الىپ بولۋعا تالپىنادى.
مىنە، وسى تۇستا اتا-انالارىمىز ءتۇرلى قيىنشىلىقتارعا تاپ بولاتىنى بەلگىلى. ءبىرى بالاسىن ينتەللەكتۋالدىق ورتالىقتارعا بەرسە، ال ءبىرى بالاسىن الەۋەتى جەتپەيتىن ۇيىرمەلەرگە جەتەكتەيتىنى راس. بىراق «جاس اعاشتى قالاي يسەڭ، سولاي وسەدى» دەگەن ءتامسىلدى جادىمىزدان شىعارماعانىمىز ءجون. ال سپورتقا اۋەس بالانىڭ بەتىن قاقپاي، تاڭداعان سپورت تۇرىنە جول سىلتەۋ – اتا-انانىڭ پارىزى. سەبەبى سالاۋاتتى ۇرپاق – سالاماتتى ەلدىڭ كەپىلى.
وسى ورايدا بالاسىن «Astana Qazaqstan Team» ۆەلوكومانداسىنىڭ جەتكىنشەكتەر ۇيىرمەسىنە بەرىپ، اۋەل باستان ۆەلوسپورتقا باۋلىعان گۇلدانا سارسەنقىزى بالاسىنىڭ ءوزى قالاعان سپورت تۇرىنە بارعانىنا وتە قۋانىشتى.
«مەنىڭ ۇلىم احمەتوۆ مانسۇر 12 جاستا، ۆەلوسپورتپەن اينالىسادى. بالام جاتتىعۋلارىن «سارىارقا» ۆەلوترەگىندە وتكىزەدى جانە ءوز جاتتىقتىرۋشىلارىن قاتتى جاقسى كورەدى. اۋا رايى قانداي بولماسىن جاتتىعۋىنا بارۋعا اسىعادى. ەگەر جاتتىعۋدا جاڭا ءبىر نارسە ۇيرەنسە، ول تۋرالى قۋانا ايتىپ كەلەدى. ول وسىعان دەيىن بىرنەشە جارىستارعا قاتىستى، ناتيجەلەرى جامان ەمەس، جاتتىقتىرۋشىلارى ناتيجەلەرىنە ءدان ريزا»، – دەدى مانسۇردىڭ اناسى.
سونىمەن بىرگە اينۇر عابدۋللاقىزى دا ۇلى كاريمجاننىڭ جەتكەن جەتىستىكتەرى ءۇشىن «Astana Qazaqstan Team» ۆەلوكومانداسىنىڭ جەتكىنشەكتەر ۇيىرمەسىنە العىسىن بىلدىرەدى.
«ارينە، «Astana Qazaqstan Team» ۇيىرمەسىنە كوڭىلىمىز تولادى. اسىرەسە، جاتتىقتىرۋشىمىز اميليا بولاتقىزىنا العىسىمىز شەكسىز. توپتاعى ەڭ كىشى بالا بولسا دا، جاتتىقتىرۋشىلار بىزگە سەنىم ارتۋدا. ءبىز دە سەنىمدەرىنەن شىعۋعا تىرىسۋدامىز»، – دەدى ول.
ال بالاسىنىڭ شىمىرلىعىنا سۇيسىنگەن كاسىموۆا الميرا حانىم بولسا، جاتتىقتىرۋشىلار قۇرامىنىڭ شەبەرلىگىن تىلگە تيەك ەتتى.
«بالام 2 جاستان باستاپ جارىستارعا قاتىسىپ كەلەدى. باپكەرلەرىنە بالامىزدىڭ فيزيكالىق دامۋىنا قوسقان ۇلەستەرى مەن سپورتتىق ماقساتتارعا قول جەتكىزۋدەگى تاباندىلىقتارى ءۇشىن العىس ايتامىن. سىزدەردىڭ پەداگوگيكالىق شەبەرلىكتەرىڭىزدىڭ ارقاسىندا ءبىزدىڭ جاس چەمپيوندارىمىز ۇلكەن ىقىلاسپەن ءاربىر جاتتىعۋعا بارۋعا اسىعادى جانە كەلەسىسىن تاعاتسىزدانا كۇتەدى»، – دەدى الاننىڭ اناسى.
«ۇلگى بولار اعانىڭ ءىزىن باس تا، جولىن قۋ» دەگەن. جاس جەتكىنشەكتەرىمىزگە الەكساندر ۆينوكۋروۆ سىندى اعالارىنىڭ جولىن بەرسىن دەيمىز!
«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق، قۇرىلتايشىسى – تۋريزم يندۋسترياسى مەن سپورتتى قولداۋ قورى.
ورالباي مەرگەنبايۇلى
