ناۋرىز مەيرامىنا وراي استانادا مادەني ويىن-ساۋىق باعدارلاماسى ازىرلەندى. ءداستۇر بويىنشا باستى شارالار 21-22 ناۋرىزدا قالانىڭ اشىق الاڭدارىندا ساعات تاڭعى 10.00-دەن كەشكى 18.00-گە دەيىن وتەدى.
بيىلعى شارالار حالىقتىق سەرۋەن «ەكسپو» كورمەسى اۋماعىندا ۇيىمداستىرىلادى. مەرەكەلىك شارالار، سونداي-اق، «قازاق ەلى» الاڭىندا، قالالىق الاڭدا، «ستۋدەنتتىك» ساياباقتا جانە قالانىڭ تۇرعىن الاپتارىندا دا وتەتىن بولادى.
«21-22 ناۋرىزدا «استانا ەكسپو» حالىقارالىق مامانداندىرىلعان كورمەسى اۋماعىندا كيىز ۇيلەر تىگىلىپ، ەتنواۋىل اشىلادى، جينالعان قاۋىمنىڭ نازارىنا مەرەكەلىك كونتسەرت ۇسىنىلادى. استانا قالاسى تەاترلارىنىڭ ارتىستەرى مەن ەتنومادەني بىرلەستىكتەردىڭ وكىلدەرى ءاربىر كيىز ءۇيدىڭ جانىندا قازاق حالقىنىڭ سالت-داستۇرلەرىن كورسەتەدى. بۇدان باسقا، فۋد-كورت ايماعى ۇيىمداستىرىلادى. وندا پالاۋ، ناۋرىز كوجە مەن باۋىرساق دايىنداۋعا ارنالعان قازاندار تۇرادى. ساۋدا ورىندارىندا شىعىس اسپازدىعىنان ىستىق تاعامدار ساتىلادى. سونداي-اق ساندىك-قولدانبالى ونەر بۇيىمدارىن ساتۋ-كورمەسى ۇيىمداستىرىلادى»، – دەلىنگەن حابارلامادا.
- ەتنواۋىل ايماعىندا حالىق اراسىندا قازاق كۇرەس، ارقان تارتىس، گىر كوتەرۋ، قوي كوتەرۋ سياقتى ۇلتتىق ويىندار ويناتىلادى.
- مۇنىمەن قوسا، ناۋرىز مەيرامىن مەرەكەلەۋ اياسىندا ەتنواۋىل اۋماعىندا يت جارىسى، تازى مەن توبەتتەر كورمەسى وتەدى.
- استانانىڭ مادەنيەت مەكەمەلەرىندە دە ناۋرىز مەيرامىنا ارنالعان شارالار ۇيىمداستىرىلادى.
- 21 ناۋرىزدا كونگرەسس-ورتالىقتا قازاقستاندىق «جاڭارعان جەر، باق قونعان نۇرلى ەل» ميۋزيكلى كورسەتىلەدى.
«شاراعا جاس تالانتتار، وپەرا، بالەت، تەاترى سىندى ساحنا ونەرىندەگى جاڭا تۇلعالار تارتىلعان. ميۋزيكل بارىسىندا سيمفونيالىق وركەستر الەمدىك كلاسسيكالىق مۋزىكا، قازاقستاندىق كومپوزيتورلاردىڭ بەلگىلى كومپوزيتسيالارىن ورىندايتىن بولادى»، – دەلىنگەن ۆەدومستۆونىڭ حابارلاماسىندا.
وسى كۇنى «استانا» كونتسەرت زالىندا «اۋىلىم – ءانىم» اتتى كونتسەرت وتسە، «جاستار» سارايىنىڭ قوناقتارى 20 ناۋرىزدا «جەنششينا-ۆەسنا» كونتسەرتتىك باعدارلاماسىن تاماشالاي الادى.
ال 16 ناۋرىزدا «الجير» مۇراجايىندا بالالار ءۇيىنىڭ، مامانداندىرىلعان ينتەرناتتاردىڭ تاربيەلەنۋشىلەرى ءۇشىن «دوبرو پوجالوۆات، ناۋرىز!» اتتى مەرەكەلىك تانىمدىق ويىن-ساۋىق باعدارلاماسى، «ماڭگىلىك ەل» قاقپاسىندا ەلوردانىڭ جاس سۋرەتشىلەرى مەن فوتوسۋرەتشىلەردىڭ كورمەسى وتەدى دەپ كۇتىلۋدە. ال تاريحي-مادەني مۇرا نىساندارى مەن ەسكەرتكىشتەردىڭ ساقتالۋىن قامتاماسىز ەتۋ جونىندەگى ديرەكتسيا «ناۋرىز – بەيبىتشىلىك جانە دوستىق مەرەكەسى» اتتى شارا وتكىزەدى. ساكەن سەيفۋللين مۋزەيىندە 19-23 ناۋرىز ارالىعىندا «استاناعا قوش كەلدىڭ – ءازناۋرىز» ەكسپوزيتسياسى جۇمىس ىستەمەك.
Cونداي-اق، مەرەكە كۇندەرى استانانىڭ بارلىق كىتاپحانالارىندا كىتاپ ەكسپوزيتسيالارى، ۇلتتىق سالت-داستۇرمەن تانىستىراتىن تەاترلاندىرىلعان كەشتەر، بيبليوشوۋ، تاقىرىپتىق ۆيكتورينالار، ەتنوگرافيالىق كورمەلەر كوپشىلىك نازارىنا ۇسىنىلادى.
