ءال-فارابي اتىنداعى قازاق ۇلتتىق ۋنيۆەرسيتەتىندە بەلگىلى جۋرناليست، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى نۇرتىلەۋ يمانعاليۇلى اتىنداعى وقۋ-شىعارماشىلىق زەرتحانا اشىلدى، دەپ حابارلايدى "ادىرنا" ۇلتتىق پورتالى.
ارنايى اۋديتوريانىڭ اشىلۋ سالتاناتىنا اقپارات جانە قوعامدىق دامۋ ءمينيسترى ايدا بالاەۆا، ءال-فارابي اتىنداعى قازۇۋ رەكتورى جانسەيىت تۇيمەباەۆ، نۇرعالي يمانعاليۇلىنىڭ وتباسى مۇشەلەرى، سونداي-اق مەملەكەتتىك جانە كوممەرتسيالىق باق وكىلدەرى قاتىستى.
- بۇگىن نۇرتىلەۋ يمانعاليۇلىنىڭ قۇرمەتىنە ارنالعان كەزەكتى ءىس-شارانىڭ كۋاسى بولىپ وتىرمىز. بۇل – زيالى ازاماتقا دەگەن قوعامنىڭ ۇلكەن قۇرمەتىن كورسەتەدى، - دەدى ا.بالاەۆا.
ايتا كەتەيىك، بۇعان دەيىن ن.يمانعاليۇلى اتىنداعى جۋرناليستيكا فاكۋلتەتىنىڭ ستۋدەنتتەرىنە ارنالعان ارنايى ءبىلىم بەرۋ ستەپەندياسى تاعايىندالسا، پارلامەنت سەناتى «امانات» بايقاۋى اياسىندا ارنايى پرەميا تاعايىندادى، سونداي-اق تەلەۆيزيا ارداگەرلەرى اراسىندا ۆولەيبولدان تۋرنير ۇيىمداستىرىلدى.
ن.يمانعاليۇلى تۋرالى مينيستر ا.بالاەۆا ءوز سوزىندە: «قازاق تەلەۆيزياسى سالاسىندا وزىندىك مەكتەپ قالىپتاستىرا ءبىلدى. وزىنە قاراپ بوي تۇزەگەن جاس جۋرناليستەر قاتارىنان قانشاما بۋىن شاكىرت تاربيەلەدى. ءومىرىنىڭ سوڭعى ايلارىنا دەيىن، اۋرۋ جانىنا باتىپ جۇرسە دە، جۋرناليستيكادان كەتكەن جوق. ءتۇرلى حابارلارعا شىعىپ، وي-پىكىرىن ءبىلدىرىپ ءجۇردى. ءوز كاسىبىنە دەگەن ادالدىق، جۋرناليستيكاعا دەگەن قۇرمەت وسىلاي كورىنەدى، — دەدى.
ارىپتەستەرى مەن جاقىندارى نۇرتىلەۋ يمانعاليۇلىن جىلى ەستەلىكتەرمەن ەسكە الىپ، ونىڭ بۇكىل جاسامپاز ءومىرىن تەلەجۋرناليستەردىڭ دامۋىنا ارناعانىن، جاستار رەداكتسياسىنان «قازاقستان «رترك» اق باسقارما توراعاسىنا دەيىنگى ۇلكەن ەڭبەك جولىن ءجۇرىپ وتكەنىن اتاپ ءوتتى.
ەڭبەك جولىندا بىرقاتار ۇكىمەتتىك ناگرادالاردى، «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا يە بولىپ، «پاراسات» وردەنىمەن، «ەرەن ەڭبەگى ءۇشىن» مەدالىمەن، قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن ماراپاتتالعان بولاتىن.
"ادىرنا" ۇلتتىق پورتالى
