سەمەي اكىمدىگى قالا الاڭدارىنا ورناتۋ ءۇشىن ساتىپ العان ەكى جاڭا شىرشانىڭ قۇنى جەرگىلىكتى تۇرعىنداردى تاڭعالدىردى. الەۋمەتتىك جەلىلەردە تاراعان اقپارات بويىنشا، ەكى جاڭاجىلدىق اعاشقا بيۋدجەتتەن 23 ميلليون تەڭگە جۇمسالعان، دەپ حابارلايدى "ادىرنا" ۇلتتىق پورتالى Arnapress.kz سايتىنا سىلتەمە جاساپ.
سەمەيلىكتەر شىرشالار مەن ونىڭ باعاسى سايكەس كەلمەيتىنىن ايتىپ جاتىر.
بۇل سىنعا قالالىق تكش وكىلدەرى جاۋاپ بەردى. ولار "ورال شىرشاسى" دەپ اتالاتىن جاساندى اعاشتار ماسكەۋدەن ساتىپ الىنعانىن، ءبىرىنىڭ بيىكتىگى 19 مەتر، ەكىنشىسى 18 مەتر ەكەنىن حابارلادى.
سونداي-اق، ساتىپ الۋ قۇنىنا شىرشالار عانا ەمەس، بىرقاتار قوسالقى شىعىن، سونىڭ ىشىندە بەزەندىرگىشتەر كىرەتىنى ايتىلدى.
- شىرشالار مىناداي بولىكتەردەن تۇرادى: ورتالىق الاڭداعى ۇزىندىعى 200 سانتيمەتر "جۇلدىز"; 10 مەتردەن 200 دانا جارىقديودتى گيرلياندالار; "جۇلدىز" ويىنشىعى - 47 سانتيمەتر، 25 دانا; "جۇلدىز" ويىنشىعى - 36 سانتيمەتر، 220 دانا; 245 جۇلدىز ءتارىزدى قورەكتەندىرۋ اداپتەرى. سونىمەن قاتار، باعاعا ماسكەۋدەن تاسىمالداۋ شىعىندارى، قۇراستىرۋ جانە سالىقتار كىرەدى، - دەلىنگەن تكش ءبولىمىنىڭ حابارلاماسىندا.
ەستەرىڭىزگە سالا كەتەيىك، بىرنەشە كۇن بۇرىن سەمەيدە 10,5 ميلليون تەڭگەلىك "جۇلدىزدى اسپان" ينستاللياتسياسى ورناتىلدى. سونداي-اق، قالا بويىنشا جالپى قۇنى 20 ميلليون بيۋدجەتتىك تەڭگە تۇراتىن بەس جاڭاجىلدىق شاعىن ساۋلەت نىسانى ورناتىلماق.
"ادىرنا" ۇلتتىق پورتالى
