تورعاي اۋىلىندا رولگە ماس كۇيىندە وتىرعان مەكتەپ ديرەكتورى وقۋشى قىزدى قاعىپ كەتتى، دەپ حابارلايدى “ادىرنا” ۇلتتىق پورتالى.
Sputnik.kz سايتىنىڭ مالىمەتىنشە، وقيعا 20 جەلتوقسان كۇنى كەشكى ساعات 18:40-تىڭ كەزىندە جانگەلدين اۋدانىندا بولعان.
ماۋلەنوۆ پەن قۇلجانوۆ كوشەلەرىنىڭ قيىلىسىندا Volkswagen Polo ماركالى كولىكتىڭ 62 جاستاعى جۇرگىزۋشىسى 14 جاستاعى قىزدى قاعىپ كەتكەن. رولدە اۋىل مەكتەبىنىڭ ديرەكتورى وتىرعان.
"مەديتسينالىق تەكسەرىس كەزىندە كولىك جۇرگىزۋشىسى جەڭىل دارەجەدە ماس بولعان. تەرگەۋ شارالارى جۇرگىزىلىپ جاتىر. ساراپتامالار تاعايىندالدى. سونىڭ نەگىزىندە پروتسەسسۋالدىق شەشىم شىعارىلادى", - دەيدى پوليتسەيلەر.
دەنساۋلىق ساقتاۋ باسقارماسى ۇسىنعان اقپاراتقا سايكەس، كولىك استىنا تۇسكەن قىز بىردەن جانگەلدين اۋداندىق اۋرۋحاناسىنا جەتكىزىلدى. كولىك ونى وڭ جاق جامباسىنان سوققان. وقۋشى قاتتى قورقىپ قالدى. تەكسەرىستەن كەيىن ۇيىنە جىبەرىلدى. جاراقات الماعان.
ال قوستاناي وبلىستىق ءبىلىم بەرۋ باسقارماسى ديرەكتوردىڭ دەنساۋلىق جاعدايىنا بايلانىستى دەمالىس العانىن حابارلادى.
"جۇمىسقا شىققاننان كەيىن ونىڭ ماسەلەسى پەداگوگيكالىق ەتيكا جونىندەگى كەڭەستىڭ وتىرىسىندا قارالادى", - دەيدى ماماندار.
قۇقىق قورعاۋ ورگاندارى تالاپ ەتسە، تەرگەۋ كەزىندە مەكتەپ ديرەكتورىن قىزمەتتەن شەتتەتۋى مۇمكىن.
”ادىرنا” ۇلتتىق پورتالى
