كەنتاۋدا جوعارى سىنىپتا وقيتىن ەكى قىز سوزگە كەلىسپەي قالعان. ارتى جانجالعا ۇلاسىپ، مەكتەپ اۋلاسىندا توبەلەسكەن، دەپ حابارلايدى "ادىرنا" ۇلتتىق پورتالى "Otyrar.kz" سايتىنا سىلتەمە جاساپ.
بۇل وقيعا ۆيدەوعا ءتۇسىپ قالعان. كادردا ءبىر قىز ەكىنشى قىزدىڭ شاشىنان جۇلىپ، باسىنان ۇرعىلاپ جاتىر. ال ۆيدەونى ءتۇسىرىپ تۇرعاندار اجىراتۋدىڭ ورنىنا توبەلەستى قۇپتاپ تۇرعانىن كورۋگە بولادى.
اتالعان دەرەك بويىنشا 17 جەلتوقساندا كەنتاۋ قالاسىنداعى پوليتسياعا جابىرلەنگەن قىزدىڭ اناسى ارىزدانعان. ايتۋىنشا، قىزى ءتۇرلى دەنە جاراقاتىن العان.
بەلگىلى بولعانداي، مەكتەپتىڭ جوعارى سىنىپ وقۋشىلارى سوزگە كەلىسپەي قالىپ، كەيىن ءدال مەكتەپ اۋلاسىندا توبەلەسە باستاعان. وقيعادان كەيىن قىز ءتۇرلى جاراقاتتارمەن اۋرۋحاناعا تۇسكەن.
بۇل فاكت كەنتاۋ قالاسىنىڭ پوليتسيا بولىمشەسىنە تىركەلىپ، پوليتسيا قىزمەتكەرلەرى مەن مەكتەپ اكىمشىلىگى كامەلەتكە تولماعان قىزداردىڭ اتا-انالارىمەن دە جينالىس وتكىزدى.
قۇقىق بۇزعان جاسوسپىرىمدەردىڭ اتا-انالارىنىڭ جاۋاپكەرشىلىكتەرىن قاراۋ ماقساتىندا، قر اقبتك-ءنىڭ 435-بابى بويىنشا قۇجاتتار جيناقتالىپ جاتىر. ءجاسوسپىرىم قىز دارىگەردىڭ رۇقساتىمەن اۋرۋحانادان شىققان سوڭ، قۇجاتتار ساراپتاماعا جولدانادى. ساراپشىلاردىڭ قورىتىندىسىمەن زاڭدى شەشىم قابىلداناتىن بولادى.
"ادىرنا" ۇلتتىق پورتالى
