شىمكەنت قالالىق كلينيكالىق بالالار اۋرۋحاناسىنىڭ حيرۋرگتەرى تۋماسىنان اۋىر دەرتكە شالدىققان 4 جاسار بالاعا كۇردەلى وتا جاسادى. نارەستە كۇنىندە سەپسيسپەن اۋىرعان بالاقايدىڭ اياعى ىرىڭدەپ، سان سۇيەگى شىعىپ كەتكەن. سونىڭ سالدارىنان بالاقاي وزدىگىنەن اياق باسىپ جۇرە الماي قالعان.
توسەككە تاڭىلعان بالاقايدى اياعىنا تۇرعىزۋ ءۇشىن دارىگەرلەر حيرۋرگيالىق ەمنىڭ كۇردەلى ءادىسىن قولدانعان. وپەراتسيا كەزىندە بالالار حيرۋرگتەرى ناۋقاستىڭ اياعىنىڭ زاقىمدالعان ايماقتارىن حيرۋرگيالىق جولمەن تازالاپ شىقتى. كەيىن پاتولوگيالىق شىققان سان سۇيەگىن بۋىنعا ورنالاستىرىپ بەرىپتى.
«بالانىڭ اياعى نارەستە كەزىنەن ىرىڭدەپ كەتكەندىكتەن، بۋىن جاندارىندا اناتوميالىق وزگەرىستەر بولعان. سالدارىنان سان سۇيەگىن جوعارىدان تومەن ءتۇسىرۋ قيىن بولدى. دەگەنمەن، ءبىز اناتوميالىق وزگەرگەن تىندەرىن تازالاپ، سۇيەگىن 2 سم تومەن تۇسىردىك. وتا ءساتتى ءوتتى، بالا ءوز ەركىمەن قيمىلداي الادى. بۇل بالاعا بىرنەشە وتا جاسايمىز»، - دەيدى ورتوپەد-تراۆماتالوگ بولات نۇسقاباەۆ.
مەديتسينا ماماندارىنىڭ سوزىنشە، مۇنداي وتالار سيرەك جاسالادى. وپەراتسيا كۇردەلى ءارى بىرنەشە حيرۋرگيالىق ەم كەزەڭىنەن ءوتۋى قاجەت.
